عراق میں امریکی فوجیوں کے 2 قافلوں پر پھر حملہ
بغداد (مانیٹرنگ ڈیسک) عراقیوں نے ملک سے امریکیوں کو مار بھگانے کے لئے کمر کس لی ہے۔ عراق میں ایک بار پھر امریکی فوج کے دو قافلے سڑک کنارے لگے بم کا نشانہ بنے۔ عراق کے سیکورٹی ذرائع نے پیر کو علی الصبح خبر دی کہ المثنی اور بابل میں بین الاقوامی فوجی اتحاد کے دو کاروان سڑک کنارے لگے بم کا نشانہ بنے۔ رپورٹ ملنے تک اس کارروائی میں ممکنہ طور پر ہوئے جانی و مالی نقصان کی خبر جاری نہیں ہوئی تھی۔ اصحاب کہف نامی گروہ نے اس حملے کی ذمہ داری لی ہے۔ اصحاب کہف نے اپنے بیان میں کہا کہ صوبہ بابل اور قادسیہ المثنی کی سرحد پر قابض امریکی فورسز کے کارواں کو دو دھماکہ خیز پیکٹ سے نشانہ بنایا گیا۔ قابل ذکر ہے کہ عراقی پارلیمنٹ میں، ملک سے امریکی فورسز کو نکال باہر کرنے کا بل 2 سال پہلے ہی پاس ہوچکا ہے۔ عراقی عوام، سیاسی پارٹیاں اور مزاحمتی گروہ مختلف موقعوں پر اپنے ملک میں امریکی فورسز کی موجودگی کی مخالفت اور انکو نکال باہر کرنے کا مطالبہ کررہے ہیں۔
