خضدار، ایس ایس ایف کا ”تاریخ اور سیاست“ کتاب پر تجزیاتی اسٹڈی سرکل

خضدار (انتخاب نیوز) سیو اسٹوڈنٹس فیوچر کی جانب سے خضدار میں ڈاکٹر مبارک علی کی” تاریخ اور سیاست” نامی کتاب پر تجزیاتی و تبصراتی اسٹڈی سرکل منعقد کیا گیا۔اسٹڈی سرکل تنظیم کے ایجوکیشنل سیکرٹری سلیم بلوچ اور دیگر زمہ داران کی موجودگی میں منعقد ہوا جس میں اسپیکر نعمان بلوچ تھے۔ مذکورہ کتاب پر تبصرہ کرتے ہوئے نعمان بلوچ نے کہا کہ کسی بھی کتاب کو پڑھنے سے پہلے مصنف کے بارے میں جانکاری لازمی امر ہے کیونکہ ہر مصنف غیر جانبداری یا پھر حقیقت کی جانبداری کا اظہار نہیں کرتا۔ مذکورہ کتاب کے مصنف نے بہت ساری کتابیں مختلف موضوعات پہ لکھی ہیں جن کے مطالعہ سے قاری کو یہ رائے قائم کرنے میں دقت نہیں ہوتی کہ مصنف غیر جانبدار و حقیقت پر مبنی حقائق کو بیان کرتے ہیں، ڈاکٹر مبارک علی ایک محقق اور تاریخ نویس ہیں جنھوں نے تاریخ کے مختلف موضوعات پہ متعدد کتابیں لکھی ہیں۔ مذکورہ کتاب ایک مستند کتاب ہے جو ماضی کے دریچوں سے سیاست اور سماج کے ان پہلوؤں کو مد نظر رکھ کے تصنیف کی گئی ہے کہ عوام کو اقتدار پسند قوتوں نے ہمیشہ سیاسی حوالے سے یا تو تاریخ کو توڑ مروڑ کے یا پھر تاریخ کو محدود کرکے اور حقائق کو چھپا کر عوام کو بیوقوف بنانے کی کوششیں کی۔ انہوں نے کہا کہ ماضی میں اسکی مثال یہ ہے کہ اکثر ریاستیں دوسرے خطوں کی تاریخ سے نابلدگی کے نتیجے میں خود کو طاقتور سجھتے ہوئے نرگسیت کا شکار ہوکر تاریخی عمل کا حصہ نہ بن سکیں۔ ماضی میں بادشاہی نظام اور حال میں جمہوریت کے لبادے میں اقتدار کے بھوکے من پسند تاریخ لکھ کر یا لکھوا کر تاریخی عمل میں جانبداری کرنا چاہتے ہیں حالانکہ دنیا نے کئی بار اس بات کا عملی طور پہ تجربہ بھی کیا ہے کہ تاریخی عمل کبھی بھی جانبدار نہیں ہوسکتا خواہ فطرت کے مخالفین اس عمل کو کتابی اوراق میں کتنا ہی جانبدار ظاہر کرتے رہیں۔ نام نہاد مورخین نے تاریخ کو اپنے آقاؤں کے مقاصد کی تکمیل میں استعمال کرکے نفرت اور تعصب کو فروغ دینے کا کام لیا،تعلیمی اداروں میں زہن سازی کے لئے سرمایہ دار اور اقتدار پسند قوتیں صرف اس مواد کا سہارا لیتی ہیں جو موجودہ سیاسی ضروریات کا حصہ ہے، یورپی اقوام نے محکوم اقوام کو مغربی تہذیب میں ضم کرکے ان کی انفرادیت پر کاری ضرب لگا کر انکی تہذیبی شناخت کو مٹایا اور انکی تاریخ کو مسخ کرکے رکھ دیا۔ سامراج دنیا میں آج بھی مختلف طریقوں سے پسماندہ اقوام کی تاریخ کو مسخ کرنے کا عمل جاری رکھے ہوئے ہے۔ اس خطے میں مورخوں کی جانب سے تاریخ میں پسند و ناپسند اور مزہبی عقائد کا استعمال کرکے تاریخ کو مسخ کرنے کا اندازہ ہم اس بات سے بہ آسانی لگا سکتے ہیں کہ کیسے یہاں تاریخ کو محمد بن قاسم کے بعد والے دور سے لکھ کر پہلے والے ادوار سے نظریں چرائی جاتی ہیں، یا پھر مغلیہ دور میں تاریخ کو اشوک و اکبری دور وغیرہ میں تقسیم کرکے، اسلامی تاریخ میں تاریخ کو دور جاہلیت و دیگر ادوار میں تقسیم کی وجہ سے دور جاہلیت کے تصور نے مسلمان معاشرے کے تاریخی شعور کو بڑا نقصان پہنچایا اس مفروضے کو بنیاد بنا کر گزشتہ عہد کے مطالعہ کو بیکار قرار دیا گیا اور اس دور کے علمی کارناموں کو کافروں کی پیداوار قرار دے کر رد کردیا گیا۔ مزید انہوں نے کہا کہ مصنف کے بقول ہماری تاریخ پر نوآبادیاتی دور کے گہرے اثرات ہیں پوری تاریخ کو مذہبی نقطہ نظر کے مطابق بیان کیا گیا ہے، جدید تاریخ کو اس طرح ترتیب دیا جائے کہ سماج میں فرقہ واریت اور تنگ نظری کے احساسات ختم ہوجائیں۔ مذکورہ کتاب کے مطالعے سے یہ بات عیاں ہوتی ہے کہ حکمرانوں نے اپنے تاریخ نویسوں کی مدد سے تاریخ کو ہمیشہ مسخ کرنے کی کوششوں پر زور دیا ہے۔ تاریخ کو ایسے پیش کیا گیا ہے جیسے تاریخ شخصیات کی ملکیت ہے، مصنف ان غلطیوں کی وضاحت ان الفاظ میں کرتا ہے” تاریخی عمل جب آگے بڑھتا ہے تو وہ کسی خاص شخصیت کا محتاج نہیں ہوتا کیونکہ حالات کا دباؤ اس قدر شدید ہوتا ہے کہ ایک کام ضرور تکمیل تک پہنچ جاتا ہے۔ جب یورپ کے معاشرے میں پندرہویں صدی سے تبدیلی کا آغاز ہوا تو ان حالات میں انھوں نے تجارت کی غرض سے بحری راستوں کی تلاش کی اور اسی ضرورت کے تحت واسکوڈی گاما اور کولمبس نے نئے راستوں اور ملکوں کو دریافت کیا۔ لیکن اگر یہ نہ ہوتے تب بھی ان راستوں کی دریافت ضرور ہوتی کیونکہ یہ حالات کا تقاضا اور وقت کی ضرورت تھی۔ اور جہاں حالات نے انھیں پیدا کیا وہاں یہ کسی اور کو بھی پیدا کر سکتے تھے۔“ انکا کہنا تھا کہ بلوچ تاریخ بھی اسی جبر کا شکار ہوئی بیرونی مورخوں نے من پسند تاریخ لکھ کر اور تاریخی حقائق کو توڑ مروڑ کر بلوچ قوم کو لسانی کنفیوژن، نصب العین وغیرہ میں الجھا دیا ہے، بلوچ مورخین کا کسی حد تک تو تاریخی حقائق پر سائنسی و تحقیقی کام موجود ہے لیکن پھر بھی بہت سارے ابہام اب تک موجود ہیں جس کے لئے نوجوان طبقہ خصوصا طلبہ طبقے کو تاریخ پر سائنسی بنیادوں پر تحقیق کرکے ان ابہامات کو دور کرنے کی ضرورت ہے۔ اسٹڈی سرکل کے آخر میں شرکاء نے بھی موضوع کے متعلق اپنے مثبت خیالات کا اظہار کیا اور شرکاء کے سوالوں کے تفصیلی جوابات دیئے گئے۔