بلوچ لاپتہ افراد کے لواحقین دھرنا ختم کر کے عوام کو مثبت پیغام دیں، نور محمد دمڑ

کوئٹہ (انتخاب نیوز) وزیراعلیٰ بلوچستان کی ہدایت پر سینئر صوبائی وزیر نور محمد دمڑ، پارلیمانی سیکرٹری بشریٰ رند، اراکین صوبائی اسمبلی اختر حسین لانگو اور شکیلہ نوید دہوار نے بلوچ لاپتہ افراد کے لواحقین کی جانب سے ریڈ زون پر لگائے دھرنا کیمپ کا دورہ کیا اور لواحقین سے دھرنا ختم کرنے کے حوالے سے مدلل مذکرات کیے۔ سینئر صوبائی وزیر نے لواحقین کے مطالبات کے حوالے سے آگاہ کیا کہ صوبائی حکومت نے بلوچستان ہائی کورٹ کے جج پر مشتمل جوڈیشل کمیشن قائم کیا جو اپنا کام کررہا ہے جبکہ صوبائی کابینہ کے گزشتہ اجلاس میں مِسنگ پرسن کے حوالے سے اعلیٰ اختیاراتی پارلیمانی کمیشن کے قیام کی منظوری دی گئی ہے جس میں حکومت اور اپوزیشن کے دو دو اراکین صوبائی اسمبلی شامل ہونگے اور کمیشن مِسنگ پرسن کے ایک ایک کیس کا جائزہ لیکر انکی بازیابی کے لئے اقدامات اٹھائے گا۔ وفد نے صوبے میں بارشوں کی حالیہ صورتحال اور حکومتی امدادی کارروائیوں سے متعلق بتایا کہ اس وقت تمام حکومتی مشینری صوبے کے لاکھوں متاثرین کی امداد میں مصروف عمل ہے جبکہ گزشتہ کئی روز سے دھرنے کے باعث کوئٹہ کی مصروف سڑک کے بند ہونے سے شہری مشکلات و مسائل کا شکار ہیں یہ تمام عوامل تقاضہ کرتے ہیں کہ دھرنے کے شرکاء فوری طور پر دھرنا ختم کر کے صوبے کے عوام کو ایک مثبت پیغام دیں تاہم کافی دیر جاری رہنے والے مذکرات اس وقت کامیابی حاصل نہ کرسکے جب دھرنا شرکاء نے حکومت کے خیر سگالی جذبات کو رد کرتے ہوئے دھرنا ختم کرنے سے انکار کردیا۔