بی اے پی دو دھڑوں میں تقسیم، وزیراعلیٰ کی جے یو آئی کو حکومت میں شامل کر نے کی کوشش

کوئٹہ (آن لائن) بلوچستان عوامی پارٹی دودھڑوں میں تقسیم، پارٹی کے جنرل سیکرٹری نے جلد ورکرز کنونشن منعقد کرنے کااعلان کردیا۔ تفصیلات کے مطابق بلوچستان عوامی پارٹی ایک بارپھر دو دھڑوں میں تقسیم ہوگئی چند ماہ قبل بلوچستان عوامی پارٹی کے الیکشن میں میرعبدالقدوس بزنجو کو صدر منتخب کیاگیا تھالیکن حالیہ بارشوں کے بعد بی اے پی ایک بارپھر تقسیم ہوگئی،بی اے پی کے مرکزی سیکرٹری جنرل سینیٹرمنظور احمدکاکڑ پارٹی صدر اور وزیراعلیٰ بلوچستان کی جانب سے سیلاب زدگان کی داد رسی نہ ہونے پر مایوس ہوگئے اور فیصلہ کیاہے کہ آئندہ چند دنوں میں پارٹی ورکرز کنونشن بلا کراس حوالے سے اہم فیصلہ کیاجائے گا۔ علاوہ ازیں حکومت بلوچستان میں دراڑیں وزیراعلیٰ بلوچستان میرعبدالقدوس بزنجو نے جمعیت علما اسلام کو حکومت میں شمولیت کیلئے کوششیں شروع کردیں۔ذرائع کے مطابق حکومت بلوچستان میں ایک بارپھر اختلافات سامنے آگئے ہیں پارٹی کے مرکزی سیکرٹری جنرل کی جانب سے عدم اعتماد کے بعد بی اے پی کے صوبائی وزرا اوراہم رہنماؤں کی جانب سے ناراضگی کے بعد وزیراعلیٰ بلوچستان میرعبدالقدوس بزنجو نے اپنی کرسی بچانے کیلئے جمعیت علما اسلام کو حکومت میں شامل کرنے کیلئے کوششیں شروع کردی۔