پاکستان عالمی اور علاقائی سطح پر امن کو فروغ دینے کا خواہاں ہے، جنرل قمر باجوہ

راولپنڈی (انتخاب نیوز) آرمی چیف جنرل قمر جاوید باجوہ سے سلطنت عمان اور فرانس کے سفیر کی ملاقاتیں۔ اس موقع پر بات کرتے ہوئے آرمی چیف جنرل قمر جاوید باجوہ نے کہا کہ پاکستان خلیجی ممالک کے ساتھ برادرانہ تعلقات کو قدر کی نگاہ سے دیکھتا ہے،منگل کو پاک فوج کے شعبہ تعلقات عامہ (آئی ایس پی آر)کے مطابق آرمی چیف جنرل قمر جاوید باجوہ سے سلطنت عمان کے سفیر ڈاکٹر الشیخ محمد عمر احمد المرحون نے ملاقات کی جس میں باہمی دلچسپی کے امور اور علاقائی سلامتی کی صورتِ حال پر بات چیت ہوئی۔ اس دوران مختلف شعبوں میں شراکت داری پر بھی تبادلہ خیال کیا گیا،اس موقع پر آرمی چیف جنرل قمر جاوید باجوہ نے کہا کہ پاکستان خلیجی ممالک کے ساتھ برادرانہ تعلقات کو قدر کی نگاہ سے دیکھتا ہے، پاکستان عمان کے ساتھ تعلقات دوستانہ اور تاریخی اہمیت کے حامل ہیں، دونوں ممالک میں دفاع اور میری ٹائم سکورٹی میں تعاون کے فروغ کی بڑی صلاحیت ہے،انہوں نے کہایہ شراکت داری ہماری اسٹریٹجک پارٹنرشپ میں ایک لازمی عنصر بن سکتی ہے،عمانی سفیر نے سیلاب کی تباہی پر دکھ کا اظہار کیا اور متاثرین کے اہل خانہ سے دلی تعزیت کی، عمانی سفیر نے علاقائی استحکام کے لیے پاکستان کی کوششوں کو بھی سراہا، انہوں نے ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا۔ دریں اثناء آرمی چیف جنرل قمر جاوید باجوہ نے کہا ہے کہ پاکستان فرانس کے ساتھ مشترکہ مفادات کی بنیاد پر تعلقات کو بڑھانے کے لیے پر امید ہیں، منگل کو پاک فوج کے شعبہ تعلقات عامہ(آئی ایس پی آر) کے مطابق پاکستان میں فرانس کے سفیر مسٹر نکولس گیلی نے جنرل ہیڈ کوارٹرز (جی ایچ کیو)میں سپہ سالار سے ملاقات کی، ملاقات کے دوران باہمی دلچسپی کے امور، دفاع، سیکیورٹی تعاون، علاقائی سلامتی کی صورتحال پر تبادلہ خیال کیا گیا،آئی ایس پی آر کے مطابق ملاقات کے دوران دونوں جانب سے موسم خزاں میں دوطرفہ تعلقات کو مزید فروغ دینے کی خواہش کا اعادہ کیا، فرانسیسی سفیر نے پاکستان میں سیلاب سے ہونے والی تباہی پر دکھ کا اظہار کیا اور متاثرین کے اہل خانہ سے دلی تعزیت کی اور علاقائی استحکام کے لیے پاکستان کی کوششوں کو سراہنے کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا،اس موقع پر جنرل قمر جاوید باجوہ کا کہنا تھا کہ پاکستان فرانس کے ساتھ اپنے تعلقات کو قدر کی نگاہ سے دیکھتا ہے اور ہم مشترکہ مفادات کی بنیاد پر طویل مدتی باہمی فائدہ مند تعلقات کو بڑھانے کے لیے پر امید ہیں۔