آئی جی پنجاب کو اقوام متحدہ میں پولیس ایڈوائزر کے طور پر نہ لیا جائے، پی ٹی آئی رہنما

اسلام آباد (انتخاب نیوز) پاکستان تحریک انصاف پی ٹی آئی نے اقوام متحدہ کو آئی جی پنجاب کو بطور ایڈوائزر نہ رکھنے کے لیے خط لکھنے کا فیصلہ کیا ہے۔ اسلام آباد میں میڈیا سے گفتگو کرتے ہوئے بابر اعوان کا کہنا تھا کہ عمران خان کی ہدایت پر اقوام متحدہ کے سیکرٹری جنرل اور ڈپٹی سیکرٹری جنرل کو خط بھیج رہے ہیں کہ آئی جی پنجاب فیصل شاہکار کو اپنے ایڈوائزر کے طور پر نہ لیں۔ بابر اعوان کا کہنا تھا کہ یہ ایک خراب چوائس ہے، جو شخص اپنے ملک میں سابق وزیراعظم کو سیکورٹی نہیں دے سکا وہ اقوام متحدہ کو کیا ایڈوائس دیگا۔ خیال رہے کہ آئی جی پنجاب فیصل شاہکار کو سیکرٹری جنرل اقوام متحدہ انتونیو گوتریس کے پولیس ایڈوائزر فار پیس آپریشنز کے لیے منتخب کیا گیا ہے۔ پنجاب پولیس کی ویب سائٹ پر درج معلومات کے مطابق فیصل شاہکار اس پوزیشن پر منتخب ہونے والے پہلے پاکستانی ہیں، اس سے قبل اس پوزیشن پر یورپی اور مغربی ممالک سے تعلق رکھنے والے افراد تعینات ہوتے رہے ہیں۔ آئی جی پنجاب فیصل شاہکار پاکستانی پولیس سروس کے سینیئر افسر ہیں جنہیں پاکستان پولیس سروس میں لگ بھگ 30 سال جب کہ اقوام متحدہ کے ہیڈکوارٹرز اور مختلف فیلڈ ڈیوٹیوں پراقوام متحدہ کے لیے کام کرنے کا 9سالہ تجربہ ہے۔