ملتان، دوسرے ٹیسٹ کے تیسرے روز انگلینڈ کے 355 رنز کے ہدف میں پاکستان نے 198 رنز بنا لیے

ملتان (انتخاب نیوز) ملتان دوسرے ٹیسٹ میچ میں تیسرے روز کے اختتام پر انگلینڈ کے 355 رنز کے ہدف کے تعاقب میں پاکستان نے 4 وکٹوں کے نقصان پر 198 رنز بنالیے، پاکستان کو جیت کے لیے مزید 157 رنز کی ضرورت ہے جبکہ اس کی 6 وکٹیں باقی ہیں۔ ملتان میں کھیلے جارہے میچ میں انگلینڈ کی ٹیم اپنی دوسری اننگز میں 275 رنز بنا کر آؤٹ ہوگئی تھی اور یوں پاکستان کو جیت کے لیے 355 رنز کا ہدف ملا۔ پاکستان نے 355 رنز کے ہدف کے تعاقب میں پراعتماد آغاز کرتے ہوئے بغیر کسی نقصان کے 66 رنز بنائے تھے کہ اوپنر محمد رضوان تجربہ کار فاسٹ باؤلر جیمز اینڈرسن کا نشانہ بن گئے، وہ 30 رنز بنا کر آؤٹ ہوئے۔ وکٹ کیپر بلے باز کے آؤٹ ہونے کے بعد کپتان بابر اعظم کریز پر آئے لیکن زیادہ دیر نہ ٹھہر سکے اور صرف ایک رن بنا کر اولی روبنسن کا شکار بن گئے۔ پاکستان کے تیسرے آؤٹ ہونے والے کھلاڑی اوپنر عبد اللہ شفیق تھے جو 45 رنز بنا کر آؤٹ ہوئے، انہیں فاسٹ باؤلر مارک ووڈ نے آؤٹ کیا، اس وقت ٹیم کا مجموعی اسکور 83 رنز تھا۔ بعد ازاں سعود شکیل اور امام الحق کے درمیان 108 رنز کی شراکت قائم ہوئی، امام الحق 60 کے انفرادی اسکور پر لیچ کو کیچ دے بیٹھے۔ سعود شکیل نے سیریز میں اپنی شاندار بلے بازی کا سلسلہ جاری رکھا اور اپنی چوتھی اننگز میں تیسری نصف سنچری اسکور کی۔ تیسرے دن کا کھیل ختم ہوا تو پاکستان نے 4 وکٹوں کے نقصان پر 198 رنز بنا لیے تھے، سعود شکیل 54 اور فہیم اشرف 3 رنز بنا کر کریز پر موجود ہیں۔ اس طرح پاکستان کو جیت کے لیے مزید 157 رنز کی ضرورت ہے جبکہ اس کی 6 وکٹیں باقی ہیں۔