بلاول بھٹو کی حمایت میں پیپلز پارٹی کے زیر اہتمام ملک بھر میں ریلیاں، مودی کے پتلے نذر آ تش

کراچی:کراچی چیئرمین پاکستان پیپلز پارٹی اور وزیر خارجہ بلاول بھٹو کی حمایت میں پاکستان پیپلز پارٹی کے زیر اہتمام ملک بھر سمیت کراچی و اندرون سندھ کے مختلف شہروں میں بھی میں ریلیاں نکالی گئیں، ریلیوں میں مظاہرین نے مودی کے پتلے نذر آتش کیے۔مظاہرین نے پریس کلب کے سامنے مودی کا پتلہ بنا کر اس پر ڈنڈوں کی برسات کر دی، کارکنوں کی جانب سے بعد ازاں مودی کے پتلے کو نذر آتش کر دیا گیا، کارکنوں نے ہندوستان کے جھنڈے سڑکوں پر بچھا دیے۔جیالوں کا کہنا تھا کہ پاکستان پیپلز پارٹی کے قائد بلاول بھٹو زرداری جرات مندانہ صلاحیتوں کے مالک ہیں۔کراچی پریس کلب کے سامنے احتجاجی مظاہرہ کیا گیا مظاہرے سے پاکستان پیپلز پارٹی سندھ کے صدر نثار احمد کھوڑو،جنرل سیکرٹری سینیٹر سید وقار مہدی، کراچی ڈویڑن کے صدر و صوبائی وزیر سعید غنی و دیگر قائدین احتجاج میں شرکت کی اور احتجاجی مظاہرین سے خطاب کیا۔کراچی میں پریس کلب کے سامنے احتجاجی مظاہرین سے خطاب کرتے ہوئے رہنما پیپلز پارٹی اور وزیر محنت سندھ سعید غنی نے کہا کہ بلاول بھٹو نے امریکہ میں بتایا کہ مودی گجرات کا قصائی ہے، مودی نے کشمیر کا سٹیٹس تبدیل کیا، وزیر خارجہ نے امریکہ میں بہادری سے بات کی، بلاول بھٹو ملک کے اگلے وزیر اعظم ہونگے۔سعید غنی کا مزید کہنا تھا کہ کہ بھارت میں تعصب پسند جماعت نے پاکستان پیپلز پارٹی کے چیئرمین وزیر خارجہ بلاول بھٹو زرداری کے خلاف مظاہرے شروع کر دیے ہیں،آج پوری پاکستانی قوم باہر نکلی ہے اور بی جے پی کو بتا رہی ہے کہ اگر تم بلاول بھٹو کے خلاف کے حلاف مظارے کروگے توپورا پاکستان بلاول بھٹو کے ساتھ کھڑا ہے،پیپلز پارٹی نے ہمیشہ بھارتی مظالم کے خلاف آواز اٹھائی ہے جب ہمارے وزیر خارجہ نے امریکہ میں خطاب کیا تو کشمیریوں پر مظالم کرنے والوں کو بے نقاب کیا۔نثارکھوڑو اور وقار مہدی نے اپنے خطاب میں کہا کہ آج بلاول بھٹو زرداری نے پوری دنیا کو بتا دیا ہے کہ بھارت نے کس طریقے سے کشمیر پر قبضہ کیا ہوا ہے اور بھارت کی جانب سے جو مظالم کشمیریوں پر کئے جارہے ہیں وہ انسانی حقوق کی خلاف ورزی ہے۔حیدرآباد میں بھی پاکستان پیپلز پارٹی کی جانب سے ضلع صدر صغیر قریشی کی قیادت میں وزیر خارجہ بلاول بھٹو زرداری کی حمایت اور مکار بھارتی وزیراعظم مودی کے خلاف احتجاجی مظاہرہ کیا گیا۔مظاہرے میں جیالوں نے بڑی تعداد میں شرکت کی، مظاہرین نے ہاتھوں میں بھارت مخالف پلے کارڈ اور بینر اٹھا رکھے تھے جس پر نریندر مودی کے خلاف نعرے درج تھے، مظاہرین نے مودی کے خلاف نعرے بازی بھی کی، مظاہرین کا کہنا تھا کہ بھارت میں پاکستانی سفارت خانے پر بلاول بھٹو کے خلاف احتجاج کی مذمت کرتے ہیں۔حیدرآباد میں مظاہرے سے خطاب کرتے ہوئے مقررین نے کہا کہ وزیر خارجہ بلاول بھٹو زرداری نے پوری دنیا میں پاکستان کا نام بلند کیا، بھارتی وزیراعظم پوری دنیا کے لیے خطرہ ہے، بلاول بھٹو زرداری نے کشمیر کے مسئلہ پر اقوام متحدہ میں بھرپور آواز بلند کی، بلاول بھٹو مظلوم کشمیریوں کی آواز ہے، اس موقع پر احتجاجی مظاہرین نے بھارت کا جھنڈا اور نریندر مودی کی تصویریں نذرآتش کیں۔شکارپور میں بھی پیپلز پارٹی کے کارکنوں نے مودی سرکار اور بی جے پی کی جانب سے وزیر خارجہ کے متعلق پروپیگنڈا کے خلاف ریلی نکال کر احتجاج کیا، ریلی وفاقی وزیر نجکاری عابد بھیو کی رہائش گاہ سے پریس کلب تک نکالی گئی اس موقع پر پریس کلب کے باہر احتجاجی مظاہرہ بھی کیا گیا۔لاڑکانہ میں بھی پیپلز پارٹی کی جانب سے بلاول بھٹو زرداری کی حمایت اور مودی کے خلاف احتجاجی مظاہرے مودی سرکار کے خلاف نوڈیرو، رتوڈیرو، ڈوکری، باقرانی اور باڈہ میں بھی احتجاجی مظاہرے کیے گئے، لاڑکانہ میں ہونے والے مظاہرے کی قیادت رکن قومی اسمبلی نصیبہ چنہ نے کی، جس میں بڑی تعداد میں کارکن شریک ہوئے، درجنوں جیالوں نے بازوؤں پر سیاہ پٹیاں اور ہاتھوں میں پینا فلیکس تھامے ہوئے تھے۔