اسرائیلی فوج نے مغربی کنارے سے 4 فلسطینیوں کو گرفتار کر لیا
رملہ(مانیٹرنگ ڈیسک)اسرائیلی فوج نے مغربی کنارے میں چھاپے کے دوران4 فلسطینیوں کو گرفتار کر لیا۔ اسرائیلی فوج کے ترجمان نے بتایا کہ اسرائیلی فوج نے مغربی کنارے میں چار فلسطینیوں کو گرفتار کیا، اسرائیلی فوج نے دو بھائیوں محمد یوسف علقم ، احمد یوسف علقم اور رہا ہونے والے قیدی آیسر محمد ذعاقیق کوالخلیل کے بیت امر قصبے میں ان کے گھروں پر چھاپہ مار کر گرفتار کر لیا۔ اسرائیلی فوج نے گھروں پر چھاپہ مارنے کے لئے سونگھنے والے کتوں کا استعمال کیا، مکینوں کو حراست میں لیا، ان کے ساتھ بدسلوکی کی اور ذعاقیق کے گھر سے دو ’’آئی پیڈز اور ایک موبائل فون‘‘ضبط کیا۔ اسرائیلی فوج مغربی کنارے کے شہروں اور دیہاتوں میں تقریباً روزانہ گرفتاری مہم اور چھاپے شروع کرتی ہیں۔ فلسطینی اسیران کلب کے مطابق گذشتہ نومبر میں فلسطینیوں کی گرفتاری کے 380 کیسز رپورٹ ہوئے جن میں 41 بچے اور 11 خواتین شامل تھیں۔
