پاکستان اور قازقستان تجارتی راہداری معاہدے پردستخط کرنے پر متفق

اسلام آباد(انتخاب نیوز) پاکستان اور قازقستان نے تجارتی راہداری معاہدے پر دستخط کرنے پر اتفاق کیا ہے ۔جمعرات کووفاقی وزیر تجارت سید نوید قمر سے قازقستان کے سفیر یرژان کستافین نے ملاقات کی ۔ ملاقات میں قازقستان پاکستان ٹرانزٹ ٹریڈ ایگریمنٹ پر دستخط کرنے پر اصولی اتفاق کیا گیا، قازقستان اور پاکستان کے درمیان تجارت کے فروغ کے لیے ممکنہ مواقعوں پر تبادلہ خیال کیا گیا ۔ سید نوید قمر نے کہاکہ دونوں ممالک کے درمیان مضبوط اقتصادی اور تجارتی تعلقات کو مزید مستحکم کرنے کے خواہاں ہیں۔انہوںنے کہاکہ دونوں فریق معاہدوں کو پایہ تکمیل تک پہنچانے کے عمل کو تیز کریں گے۔ انہوںنے کہاکہ پاکستان آنے والے مہینوں میں تجارت پر مشترکہ ورکنگ گروپ کے اگلے اجلاس کی میزبانی کرے گا۔ سفیر نے وزیر کی حمایت پر ان کی تعریف کی اور امید ظاہر کی کہ معاہدوں کو جلد حتمی شکل دی جائے گی۔ سفیر نے پاکستانی کھیلوں کے سامان، فرنیچر اور سیاحت میں بھی گہری دلچسپی ظاہر کی۔ سید نوید قمر نے سفیر کو او آئی سی کے رکن ممالک کے 18ویں تجارتی میلے میں بطور مہمان خصوصی مدعو کیا۔او آئی سی تجارتی میلہ 16 سے 18 جولائی 2023 کو لاہور میں خواتین کی کاروباری شخصیت کے موضوع پر منعقد ہو گا۔سید نوید نے قازق حکومت کو او آئی سی کے تجارتی میلے میں "خصوصی پویلین” قائم کرنے کی بھی دعوت دی۔