خواتین پر پابندیاں، اقوام متحدہ نے افغانستان میں فلاحی کام روکنے کی دھمکی دیدی
نیویارک :اقوام متحدہ نے خواتین پر پابندیوں کے خلاف افغانستان میں فلاحی کام روکنے کی دھمکی دے ڈالی۔ غیر ملکی خبر رساں ایجنسی کے مطابق اقوام متحدہ نے کہا کہ خواتین پر مختلف اقسام کی پابندیاں لگا کر عالمی ادارے کو افغانستان میں فلاحی کام روکنے پر مجبور کیا جارہا ہے۔ اقوام متحدہ کے مطابق خواتین پر پابندی اقوام متحدہ کے چارٹر سمیت بین الاقوامی قوانین کے تحت غیر قانونی ہے لہٰذا اقوام متحدہ اس کی تعمیل نہیں کرسکتا۔ عالمی ادارے نے کہا کہ افغان عوام کے لیے اس بحران کے کسی بھی منفی نتائج کی ذمہ داری ڈی فیکٹو حکام پر ہوگی۔ واضح رہے کہ افغان عبوری حکومت کی جانب سے سال 2021 ءمیں اقتدار میں آنے کے بعد سے افغان خواتین پر متعدد پابندیاں عائد کی گئی ہیں، جن میں خواتین کی اعلیٰ تعلیم اور سرکاری نوکریوں کی پابندی سرفہرست ہیں۔ افغان حکام نے خواتین پر ملکی و غیر ملکی این جی اوز کے ساتھ کام کرنے پر بھی پابندی لگا رکھی ہے۔
