برطانوی وزیرِ داخلہ کا پاکستانیوں کو جنسی زیادتی کا مجرم کہنا سیاسی بیان ہے، برٹش جج

مانچسٹر(مانیٹرنگ ڈیسک)بر طانوی پاکستانی جج غزن محمود نے کہا ہے کہ برطانوی وزیرِ داخلہ کا پاکستانیوں کو جنسی زیادتی کا مجرم کہنا سیاسی بیان ہے۔مانچسٹر میں تقریب سے خطاب کرتے ہوئے جج غزن محمود نے کہا کہ وزیرِ داخلہ نے براہ راست پاکستانیوں کو ہدف بنایا ہے، ان کا بیان غیرمنصفانہ اور غیر ایماندارانہ ہے۔جج غزن محمود کا کہنا ہے کہ وزیرِ داخلہ کو غلط مشورے دیئے گئے ہیں، اعداد و شمار سے واضح ہے ان کا بیان یکسر غلط ہے، جنسی جرائم میں ملوث افراد کی اکثریت برٹش پاکستانیوں کی نہ ہے نہ کبھی تھی۔تقریب سے خطاب کرتے ہوئے سابق چیف پراسیکیوٹر نذیر افضل نے کہا کہ برٹش پاکستانیوں کو جنسی زیادتی کا ذمہ دار کہنا درست نہیں، میں نے راچڈیل گرومنگ سکینڈل میں ملوث مجرموں کو سزا دلوائی، برٹش پاکستانی قانون پر عمل کرنے والے افراد ہیں۔انہوں نے کہا کہ وزیرِ داخلہ کے بیانات سے بر طانوی پاکستانی تقسیم نہیں ہوں گے، یقینی بنائیں گے کہ ہمارے بچوں کو وہ مواقع ملیں جو ہمیں نہیں ملے، ہم ملزمان کو انصاف کے کٹہرے میں لائیں گے۔نذیر افضل نے کہا کہ جنسی زیادتیوں کے واقعات میں سب سے زیادہ ملوث سفید فام برطانوی ہیں، وزیرِ داخلہ کو کہنا چاہیے تھا جنسی زیادتی کے واقعات میں سفید فام ملوث ہیں۔