بھارتی ریاست اڑیسہ میں مسافر اور مال بردار ٹرینوں میں تصادم، 30 افراد ہلاک، سو سے زائد زخمی

نئی دہلی (مانیٹرنگ ڈیسک) بھارتی ریاست اڑیسا میں مسافر اور مال بردار ٹرین میں ٹکر کے نتیجے میں تیس افراد ہلاک، سو سے زائد زخمی ہوگئے، مزید ہلاکتوں کا خدشہ۔ بھارتی میڈیا کے مطابق ٹکر کے نتیجے میں شالیمار چنئی کورومنڈل ایکسپریس کی آٹھ بوگیاں پٹڑی سے الٹ گئیں۔ حادثہ شام 7 بج کر 20 منٹ پر اڑیسا کے ضلع بالاسور میں پیش آیا۔ رپورٹس کے مطابق مسافربردار ٹرین چنئی سینٹرل اسٹیشن کی طرف جارہی تھی، ابتدائی طور پر 30 ہلاکتوں کی اطلاعات ہیں تاہم حادثے میں مزید ہلاکتوں جبکہ کئی افراد کے زخمی ہونے کا خدشہ ہے۔ حکام کے مطابق نیشنل ڈیزاسٹر ریسپانس فنڈ کے تین یونٹس، 60 ایمبولینسوں سمیت ڈاکٹرز اور رضاکاروں کی ٹیمیں جائے حادثہ کی طرف روانہ کردی گئی ہیں۔ بھارتی میڈیا رپورٹس کے مطابق جائے حادثہ کے قریب ایک اور ٹرین بھی پٹڑی سے اتر گئی ہے۔