لندن پولیس نے 8 گھنٹے تفتیش کے بعد عادل راجا کو رہا کردیا
لندن (مانیٹرنگ ڈیسک) سوشل میڈیا ایکٹوسٹ اور یو ٹیوبر عادل راجہ کو کئی گھنٹے کی تفتیش کے بعد لندن پولیس نے رہا کر دیا۔ عادل راجہ کے وکیل مہتاب عزیز نے لندن میں پریس کانفرنس کرتے ہوئے تصدیق کی کہ یوٹیوبر عادل راجہ کو پولیس نے تفتیش کے بعد رہا کر دیا ہے، عادل راجہ کو پولیس نے تقریباً 8 گھنٹے حراست میں رکھا۔ مہتاب عزیز کا کہنا تھا عادل راجہ نے پیر کو اپنا یوٹیوب چینل بند کرنے پر بات کی تھی، منگل کو عادل راجہ کی گرفتاری کے بعد ان سے رابطہ کرنے کی کوشش کی، عادل راجہ اور ان کی فیملی کے ارکان کے فون بھی فی الحال بند ہیں۔ وکیل مہتاب عزیز کا مزید کہنا تھا خیال ہے کہ عادل راجہ کو انسداد تخریب کاری قانون کے تحت گرفتار کیا گیا، عادل راجہ کسی غلط کام میں ملوث ہوتے تو میں خود پولیس کو رپورٹ کرتا لیکن مجھے یقین ہے کہ عادل راجہ کسی غلط کام میں ملوث نہیں ہے۔ خیال رہے کہ سوشل میڈیا ایکٹوسٹ اور یوٹیوبر عادل راجہ پر پاکستان میں 9 مئی کو ہونے والے واقعات میں عوام کو ریاست پاکستان مخالف جذبات ابھارنے پر انسداد تخریب کاری کی دفعات کے تحت مقدمہ درج ہے، عادل راجہ کے خلاف پاکستانی حکام نے مختلف شکایات درج کرائی ہوئی ہیں۔
