پائیدار امن کیلئے مسئلہ کشمیر کا پرامن حل ضروری ہے، طیب اردگان
نیویارک (مانیٹرنگ ڈیسک) ترکیہ کے صدر رجب طیب اردگان نے مسئلہ کشمیر ایک بار پھر اقوام متحدہ کی جنرل اسمبلی میں اٹھاتے ہوئے کہا کہ پائیدار امن کیلئے مسئلہ کشمیر کا پرامن حل ضروری ہے۔ طیب اردگان نے اقوام متحدہ کی جنرل اسمبلی کے 78ویں اجلاس سے خطاب کرتے ہوئے کہا کہ مسئلہ کشمیر کے پائیدار حل کے لئے پاکستان اور بھارت کے درمیان مذاکرات کے حامی ہیں، مسئلہ کشمیر پر مذاکرات کے لئے ترکیہ اپنا کردارادا کرنے کے لئے تیار ہے، امن کے قیام کیلئے نئی حکمت عملی اور ایجنڈے کی ضرورت ہے۔ ترکیہ کے صدر نے کہا کہ اقوام متحدہ کو اپنے قیام کے مقاصد کی عکاسی کو بہتر انداز میں کرنا چاہیے، امن کے قیام کے لئے نئی حکمت عملی اور ایجنڈے کی بھی اشد ضرورت ہے، یوکرین کی جنگ کو مذاکرات کے ذریعے حل کیا جانا چاہیے۔ طیب اردگان نے کہا کہ دنیا میں تنازعات کے خاتمے اور امن کے فروغ پر یقین رکھتے۔ شام کی صورتحال کی وجہ سے ترکیہ پر پناہ گزینوں کا بوجھ ہے۔
