سینئر رہنماﺅں کو دھمکی کی مذمت کرتے ہیں، ڈاکٹر فہیم آفریدی الزام تراشی سے باز آئیں، بلوچ ڈاکٹرز فورم

کوئٹہ (پ ر) بلوچ ڈاکٹرز فورم کے سینئر رہنما?ں کو دھمکی دینے کی شدید الفاظ میں مذمت کرتے ہیں۔ ڈاکٹر فہیم آفریدی بے بنیاد الزام تراشی سے باز آئیں۔ اگر ہمارے کسی بھی ساتھی کو کسی بھی قسم کا نقصان پہنچتا ہے تو اسکی ذمہ داری ڈاکٹر فہیم آفریدی اور اسکے گروپ پر عائد ہوگی۔ بلوچ ڈاکٹرز فورم کے مرکزی ترجمان نے ڈاکٹر فہیم آفریدی کی جانب سے سینئر بلوچ ڈاکٹرز پر بے بنیاد الزامات لگانے کی سخت الفاظ میں مذمت کرتے ہوئے کہا کہ ایک سوشل میڈیا نیوز کو بنیاد بنا کر FIA کی جانب سے بلوچ سینئر ڈاکٹرز کو بلانا اور نامعلوم نمبروں سے دھمکی آمیز پیغامات اور کال انتہائی نامناسب اقدام ہے۔ ہمارے سینئر دوستوں سمیت تمام بلوچ ڈاکٹرز کی عزت نفس کو مجروح کیا گیا جو ایک قابل نفرت عمل ہے۔ انہوں نے مزید کہا کہ طب جیسے معزز پیشے میں زبان اور قومیت کی بنیاد پر اس طرح کے اقدامات کو ڈاکٹر برادری یقیناً ناپسندیدگی کی نگاہ سے دیکھے گی اور اس غیر ذمہ دار شخص کی سرزنش کریگی۔ بلوچ ڈاکٹر فورم نے وزیراعلیٰ بلوچستان، وزیر صحت اور سیکرٹری صحت سے مطالبہ کیا کہ سوشل میڈیا پر وائرئل اس نیوز کو سنجیدہ لیا جائے اور ایک غیر جانبدار انکوائری کمیٹی کے ذریعے ان تمام الزامات کی صاف و شفاف انکوائری کی جائے تاکہ حقیقت عیاں ہوں۔ بلوچ ڈاکٹرز فورم کے ترجمان نے کہا کہ ہم یہ واضح کرنا چاہتے ہیں کہ اگر ہمارے ڈاکٹرز کو کسی بھی قسم کا کوئی نقصان پہنچا تو اسکی تمام تر ذمہ داری ڈاکٹر فہیم آفریدی پر عائد ہوگی۔