بلوچ لاپتا افراد کو انسانی ہمدردی کی بنیاد پر بحفاظت بازیاب کرایا جائے، لواحقین کا مطالبہ
کوئٹہ (پ ر) 14 فروری 2022ءڈھاڈر سے جبری طور پر لاپتہ کئے جانے والے مزار خان ولد گل خان کے اہل خانہ نے اپیل کی ہے کہ مزار خان کو انسانی ہمدردی کی بنیاد پر بازیاب کرایا جائے۔ انہوں نے کہا ہے کہ مزار خان بے قصور ہے اور انہیں کو بلا جواز جبری گمشدگی کا نشانہ بنا کر ان کے خاندان کو اجتماعی سزا دی جا رہی ہے۔ اگر انہوں نے کوئی گناہ کیا ہے، کوئی جرم کیا ہے تو انہیں عدالتوں میں پیش کیا جائے اور جرم ثابت ہونے کے بعد سزا دی جائے، ہمیں کوئی اعتراض نہیں، لیکن کسی بے گناہ کو اس طرح جبری گمشدگی کا نشانہ بنانا بنیادی انسانی حقوق کی خلاف ورزی ہے۔ لواحقین نے انسانی حقوق کی تنظیموں سے اپیل کی ہے کہ وہ مزار خان کی بازیابی کے لیے اپنا کردار ادا کریں۔ علاوہ ازیں مشکے کے رہائشی ممتاز بلوچ کی بھانجی بانڑی بلوچ نے کہا ہے کہ میرے ماموں ممتاز بلوچ کو 6 ستمبر 2022 کو خضدار سے تیسری بار جبری گمشدگی کا نشانہ بنایا گیا انہوں نے کہا کہ ہم گزشتہ ڈیڑھ سال سے جس اذیت سے گزر رہے ہیں۔ خضدار سے جبری طور پر لاپتہ کیے گئے کبیر بلوچ، عطا اللہ اور مشتاق بلوچ کے خاندان گزشتہ 15 سال سے اس اذیت سے گزر رہے ہیں۔ انہوں نے کہا کہ جبری گمشدہ افراد کے خاندانوں کا درد اور اذیت کسی جبری لاپتہ فرد کے لواحقین کو اچھی طرح معلوم ہے کیونکہ وہ خود اس درد میں مبتلا ہیں۔ انہوں نے کہا کہ آئیے ان خاندانوں کی آواز بنیں اور بلوچ وائس فار جسٹس کی جانب سے 27 مارچ 2024 کو کبیر بلوچ، عطاءاللہ اور مشتاق بلوچ کی بازیابی کے لیے X پر شام 7 بجے سے 12 بجے تک مہم چلائی جائے گی۔ میں آپ سب سے اس مہم میں شامل ہونے کی اپیل کرتی ہوں۔ لاپتہ کبیر بلوچ اور ان کے ساتھیوں کے خاندانوں کی آواز بنیں۔ جبکہ خاران کے رہائشی جبری لاپتہ شاہ فہد بلوچ کی ہمشیرہ نادیہ بلوچ نے کہا ہے کہ میرے بھائی شاہ فہد کو 2022 میں خاران سے جبری لاپتہ کیا گیا ہے۔ انہوں نے کہا کہ جبری گمشدگی انسانیت کے خلاف سنگین جرم ہے، آئیے سب مل کر اس جرم کے خلاف آواز بلند کریں۔ انہوں نے کہا کہ میں تمام سوشل میڈیا ایکٹوسٹ سے اپیل کرتی ہوں کہ 2009 میں خضدار سے جبری طور پر لاپتہ کبیر بلوچ، عطا اللہ بلوچ اور مشتاق بلوچ کی بازیابی کے لیے 27 مارچ کو شام 7 بجے سے 12 بجے تک مہم چلائی جائے گی، آپ سب اس مہم میں حصہ لے کر جبری گمشدگیوں کے خلاف جنگ میں لواحقین کا ساتھ دیں۔
