کوئٹہ میں بلدیاتی انتخابات رکوانے کیلئے سیاسی جماعتوں نے بلوچستان ہائیکورٹ میں پٹیشن دائر کردی

کوئٹہ (یو این اے) بلوچستان میں بلدیاتی انتخابات کے حوالے سے سیاسی ہلچل بڑھ گئی ہے۔ صوبے کی مختلف سیاسی جماعتوں نے بلوچستان ہائی کورٹ میں پٹیشن دائر کر کے انتخابات کے موخر کرنے کا مطالبہ کیا ہے۔ یونس بلوچ اور دیگر رہنماﺅں نے پٹیشن میں موقف اختیار کیا ہے کہ صوبے میں موسمی حالات کی شدت اور ووٹر لسٹوں میں موجود خامیاں انتخابات کے شفاف اور بروقت انعقاد میں رکاوٹ ہیں۔ پٹیشن میں مزید کہا گیا ہے کہ موجودہ انتخابات کے انعقاد سے صوبے میں امن و امان کی صورتحال متاثر ہو سکتی ہے اور عوامی اعتماد مجروح ہوسکتا ہے۔ اس پٹیشن میں بلوچستان عوامی پارٹی، پاکستان پیپلز پارٹی، مسلم لیگ ن، عوامی نیشنل پارٹی اور پشتونخوا نیشنل پارٹی سمیت دیگر اہم سیاسی جماعتوں نے بھی دستخط کیے ہیں اور اس معاملے میں اپنا موقف پیش کیا ہے۔ذرائع کے مطابق یونس بلوچ پہلے ہی الیکشن کمیشن کے سامنے بلوچستان حکومت کی جانب سے انتخابات کو موخر کرنے کی درخواست مسترد کرچکے ہیں، تاہم اب ہائی کورٹ کے ذریعے اس مسئلے پر فیصلہ طلب کیا گیا ہے۔ سیاسی حلقوں کا کہنا ہے کہ اس اقدام سے صوبے میں سیاسی ماحول مزید سنجیدہ ہو گیا ہے اور عدالت کے فیصلے کے بعد الیکشن کے شیڈول اور حکومتی حکمت عملی پر گہرا اثر پڑ سکتا ہے۔سیاستدانوں نے اپیل کی ہے کہ انتخابات کے انعقاد سے قبل تمام قانونی، انتظامی اور موسمی چیلنجز کا جائزہ لیا جائے تاکہ صوبے میں شفاف، پرامن اور موثر بلدیاتی انتخابات ممکن ہوسکیں۔