ہندو برادری کو ہولی مبارک، دنیا میں امن کے پیغام کو عام کرنے کی ضرورت ہے، وزیراعلیٰ بلوچستان

کوئٹہ (یو این اے) وزیراعلیٰ بلوچستان میر سرفراز بگٹی نے ہولی کے موقع پر ہندو برادری کو دلی مبارکباد پیش کی ہے، اپنے ایک تہنیتی پیغام میں وزیراعلیٰ نے کہا کہ ہندو برادری کی خوشیوں میں برابر کے شریک ہیں، انہوں نے کہاکہ دنیا بھر کو دہشت گردی اور امن وامان کی صورت میں درپیش سنگین خطرات سے نمٹنے کے لئے بین المذاہبی امن وسلامتی کے پیغام کو عام کرنے کی ضرورت ہے، وزیراعلیٰ نے کہا کہ ملک میں بسنے والے تمام دیگر مذاہب کی طرح ہندو برادری بھی ملک وقوم کی تعمیر وترقی کے لئے اپنی تمام تر صلاحیتیں بروئے کار لارہی ہے اس حوالے سے ان کا کردار قابل تحسین ہے، حکومت صوبے میں آباد تمام اقلیتوں بشمول ہندو برادری کے حقوق کے تحفظ کو یقینی بنارہی ہے، ملازمتوں میں اقلیتوں کے لئے مختص کوٹہ پر عملدرآمد کیا جارہا ہے اور ہندو برادری سمیت ملک اور بلوچستان میں بسنے والی دیگر تمام اقلیتوں کو اپنی مذہبی عبادات کی ادائیگی کی مکمل آزادی حاصل ہے جس کی مثال دنیا بھر میں نہیں ملتی۔ وزیراعلیٰ نے ہندو برادری پر زور دیا ہے کہ وہ اپنی خوشیوں میں ان افراد کو بھی شریک رکھیں جو ہولی منانے کی استطاعت نہیں رکھتے۔