چینی وفد کی ملاقات، مشاورتی عمل میں سرفراز بگٹی کو شامل کیا جائے، شہباز شریف

کوئٹہ/اسلام آباد(یو این اے )وزیرِ اعظم شہباز شریف سے چینی وفد نے ملاقات کی ہے جس کے دوران چینی کمپنی نے پاکستان میں معدنیات و کان کنی میں سرمایہ کاری بڑھانے میں دلچسپی کا اظہار کیا ہے اس موقع پر وزیرِ اعظم شہباز شریف نے چینی کمپنی کو معدنیات کے شعبے میں کان کنی سے لے کر برآمدی اشیا کی تیاری کے لیے سرمایہ کاری کرنے کی دعوت دے دی ۔ وفد نے پاکستان میں منرل پارک بنانے سے متعلق بریفنگ دیتے ہوئے مزید سرمایہ کاری کے منصوبے کا بھی بتایا وزیرِ اعظم شہباز شریف نے کہا کہ بیرونی سرمایہ کاری کے اضافے کے لیے ترجیحی بنیادوں پر اقدامات کر رہے ہیں ۔ ان کا کہنا ہے کہ چین پاکستان کا دیرینہ دوست اور ترقی میں اہم شراکت دار ہے، چین نے پاکستان کی ہر برے وقت میں مدد کی جس پر مجھ سمیت پوری قوم مشکور ہےوزیرِ اعظم شہباز شریف کا کہنا ہے کہ پاکستان کی برآمدات میں اضافے کے لیے معدنیات نکالنے، پراسیسنگ سے متعلق دیگر سرمایہ کاری کو مکمل سہولت دی جائے گی ۔ انہوں نے متعلقہ وفاقی وزرا اور افسران کو چینی کمپنی کے ساتھ مشاورت کی ہدایت کی وزیرِ اعظم شہباز شریف کی جانب سے مشاورتی عمل میں وزیرِ اعلی بلوچستان سرفراز بگٹی اور صوبے کے متعلقہ اداروں و اسٹیک ہولڈرز کو شامل کرنے کی ہدایت بھی جاری کی