امریکی عدالت نے ڈونلڈ ٹرمپ کو کاروباری ریکارڈ میں جعلسازی پر سزا سنا دی
نیویارک (مانیٹرنگ ڈیسک) امریکا کی تاریخ میں پہلی بار کسی سابق صدر کو سزا سنادی گئی ہے، امریکی عدالت نے سابق صدر ڈونلڈ ٹرمپ کو کاروباری ریکارڈ میں جعلسازی پر سزا سنا دی، گیارہ جولائی کو جج ٹرمپ کی سزا کا اعلان کریں گے۔ ڈونلڈ ٹرمپ کو نیویارک کی جیورر نے سزا سنائی، ڈونلڈٹرمپ پر فحش فلموں کی اداکارہ اسٹارمی ڈینئلز کو 1 لاکھ 30 ہزار ڈالر کی ادائیگی سے متعلق 34 الزامات عائد کیے گئے تھے، جیوری نے تمام 34 الزامات کو درست قرار دیا۔ امریکا کے سابق صدر ڈونلڈ ٹرمپ پر الزام تھا کہ ان کے اسٹارمی ڈینئلز کے ساتھ جنسی تعلقات تھے اور انہیں چھپانے کیلئے 2016 کے صدارتی انتخابات کے موقع پر اسٹارمی ڈینئلز کو رقم دی گئی تھی، جس کے نتیجے میں ڈونلڈ ٹرمپ الیکشن جیت گئے تھے۔ دوسری جانب سابق امریکی صدر ڈونلڈ ٹرمپ نے مجرم قرار دینے والی جیوری پر تنقید کرتے ہوئے کہا کہ مجھ پر یہ مقدمہ دھاندلی ہے، میں بالکل بے قصور ہوں۔ اپنے ردعمل پز ڈونلڈ ٹرمپ کا کہنا تھا کہ یہ مقدمہ میری توہین ہے، معاملہ ابھی ختم نہیں ہوا۔ جیوری کی جانب سے سزا سنائے جانے کے بعدڈونلڈ ٹرمپ نے صحافیوں کے سوالات کا جواب دینے سے گریز کیا۔
