امریکہ ، مسلح شخص نے جنرل سٹور پر گھس کر فائرنگ کر دی ،3افراد ہلاک،10زخمی
امریکہ میں مسلح شخص نے جنرل سٹور پر گھس کر فائرنگ کر دی جس کے نتیجے میں 3 افراد ہلاک اور 2 پولیس اہلکاروں سمیت 10 افراد شدید زخمی ہو گئے۔غیر ملکی خبر رساں ا دارے کے مطابق امریکی ریاست آرکنساس کے شہر فارڈائس میں فائرنگ کا واقعہ پیش آیا جہاں ایک مسلح شخص نے جنرل سٹور میں گھس کر وہاں موجود افراد پر اندھا دھند فائرنگ کر دی۔سٹور میں موجود افراد گولیاں لگنے زخمی ہوئے جن میں سے 3 شہری موقع پر ہی دم توڑ گئے۔فائرنگ کے واقعہ کے بعد مقامی پولیس کی بھاری نفری بھی موقع پر پہنچ گئی اور علاقے کی مکمل ناکہ بندی کر دی۔ پولیس کی جانب سے حملہ آور کو بھی زخمی حالت میں گرفتار کر لیا گیا۔ پولیس نے شہریوں کی لاشوں اور زخمی ہونے والوں کو ہسپتال منتقل کر دیا۔ واضح رہے کہ امریکہ میں 2024 کے آغاز سے اب تک 234 ماس شوٹنگ کے واقعات رپورٹ ہو چکے ہیں۔ امریکی گن وائلنس آرکائیو کی وضع کردہ تشریح کے مطابق حملہ آور کے علاوہ کم از کم 4 افراد کو گولیاں لگنے کے واقعے کو ماس شوٹنگ قرار دیا جائے گا۔
