وزیراعظم سے باپ پارٹی اور نیشنل پارٹی کے وفود کی ملاقاتیں

اسلام آباد(صباح نیوز)وزیراعظم محمد شہباز شریف سے بلوچستان عوامی پارٹی کے وفد نے خالد مگسی کی قیادت میں ملاقات کی اور ملکی و صوبائی سیاسی صورتحال پر تبادلہ خیال کیا۔پیر کو وزیراعظم آفس کے میڈیا ونگ سے جاری بیان کے مطابق وفد نے وزیرِاعظم کی قیادت میں معیشت کے استحکام اور عوام دوست بجٹ پر وزیراعظم کو خراجِ تحسین پیش کیا۔ وفد نے وزیراعظم کا بلوچستان کی ترقی میں خصوصی دلچسپی اور بلوچستان کی عوام کیلئے ترقیاتی اقدامات پر شکریہ ادا کیا۔دریں اثناء وزیراعظم محمد شہباز شریف سے نیشنل پارٹی کے وفد نے بھی ملاقات کی ۔ وفد میں رکن صوبائی اسمبلی بلوچستان رحمت صالح بلوچ اور سابق سینیٹر میر کبیر محمد ساہی شامل تھے۔ اس موقع پر صوبے کی سیاسی صورتحال پر تبادلہ خیال کیا گیا۔