مصطفی بھائی، پنجاب میں یہ ریلیف مفت نہیں اپنے عوام کیلئے پیسے دے کر لیا، مریم نواز

کراچی (مانیٹرنگ ڈیسک) ایم کیو ایم پاکستان کے رہنما مصطفیٰ کمال نے کہا ہے کہ صرف پنجاب میں بجلی کی قیمتوں کو کم کرنے کا فیصلہ قبول نہیں، جس پر وزیر اعلیٰ پنجاب مریم نواز نے جواب دیا کہ پنجاب نے یہ ریلیف مفت میں نہیں بلکہ اپنے عوام کے لیے پیسے دے کر لیا ہے۔ متحدہ قومی موومنٹ (ایم کیو ایم) پاکستان کے رہنما مصطفی کمال نے کراچی میں پریس کانفرنس کرتے ہوئے کہا کہ ا±مید ہے وزیرِ اعظم شہباز شریف پورے ملک کے لیے بجلی کی قیمت کم کرنے کا اعلان کریں گے، بجلی کے معاملے کو سنجیدگی سے نہیں دیکھا گیا تو پاکستان دیوالیہ ہو جائے گا۔ وزیراعلیٰ پنجاب مریم نواز نے مائیکر بلاگنگ ویب سائٹ ’ایکس‘ پر مصطفی کمال کو جواب دیتے ہوئے کہا ’پیارے مصطفی بھائی، پنجاب نے یہ ریلیف مفت میں نہیں بلکہ اپنے عوام کے لیے پیسے دے کر لیا ہے اور اس کے لیے پنجاب نے اپنے بجٹ سے 45 ارب ادا کیے ہیں‘۔ انہوں نے اپنی پوسٹ میں مزید لکھا ’مجھے خوشی ہوگی اگر آپ حکومت سندھ سے بات کریں اور وہ بھی اپنے عوام کو یہ ریلیف فراہم کریں‘۔ مصطفیٰ کمال نے ایکس پر مریم نواز کی پوسٹ کا جواب دیتے ہوئے کہا کہ پیاری مریم بی بی، آپ کے قیمتی مشورے کا شکریہ! لیکن اگر ہماری سندھ حکومت کا حسن اخلاق اور برتاﺅ پچھلے 15 سال سے اتنا ہی اچھا ہوتا تو ہمیں کیا ضرورت تھی کہ 2024 کے الیکشن سے 4 ماہ قبل ہم لاہور آ کر آپ کی پارٹی کے ساتھ غیر مشروط حمایت کا اعلان کرتے، جس پر ہم آج تک قائم ہیں۔ انہوں نے لکھا کہ میں نے آج اپنی پریس کانفرنس میں پنجاب حکومت سے درخواست نہیں کی بلکہ ریاست پاکستان کے سربراہ وزیراعظم پاکستان سے درخواست کی ہے کہ خدارا سندھ بالخصوص کراچی پر رحم کریں اور ہمیں بھی پاکستان میں برابر کا شہری سمجھ کر جینے کا حق دیں کیونکہ ریاست ماں جیسی ہوتی ہے۔