چمن میں مشترکہ مارکیٹ بنانے کا فیصلہ، افغان حکام سے بات چیت کا آغاز کردیا گیا

چمن (انتخاب نیوز) حکومت نے پاک ایران طرز پر پاک افغان بارڈر پر بھی مارکیٹ بنانے کا فیصلہ کیا ہے، مشترکہ بازار کے لیے افغان حکام کے ساتھ بات چیت کا آغاز کردیا گیا ہے۔ ڈپٹی کمشنر چمن کیپٹن (ر) راجا اطہر عباس نے نجی ٹی وی سے گفتگو میں بتایا کہ پاسپورٹ، ویزا، امیگریشن اور بارڈر کراسنگ کے مسائل کے حل کے لیے خصوصی ٹاسک فورس بنائی ہے، ایڈیشنل چیف سیکرٹری داخلہ کی سربراہی میں ٹاسک فورس روزانہ اجلاس کر رہی ہے۔ ڈپٹی کمشنر چمن کے مطابق ماسٹر پلان کو فعال کرکے 10 ہزار افراد کے روزگار کے لیے کام شروع کردیا ہے، حکومت نے پاک ایران طرز پر پاک افغان مشترکہ بارڈر مارکیٹ بنانے کا فیصلہ کیا ہے، اس سلسلے میں وفاقی اور صوبائی حکومتوں نے افغان حکام کے ساتھ بات چیت کا آغاز کردیا ہے۔ ڈپٹی کمشنر چمن کا کہنا تھا کہ باب دوستی سے آنے جانے والوں کا ڈیٹا ریکارڈ محفوظ بنانے کے لیے بارڈر ٹریولنگ کو ریگولائز کیا گیا ہے۔