جنوبی کوریا، مسافر طیارے حادثے میں ہلاکتوں کی تعداد 177 ہوگئی، دو لاپتہ

سئیول (آئی این پی )جنوبی کوریا کے موآن انٹرنیشنل ایئرپورٹ پر اتوار کو ایک مسافر طیارہ رن وے سے اتر کر حفاظتی دیوار سے جا ٹکرایا جس کے نتیجے میں کم از کم 177 افراد ہلاک ہو گئے ۔عالمی میڈیارپورٹس کے مطابق جنوبی کوریا کے جنوب مغربی شہر موآن میں ایک مسافر طیارے کو لینڈنگ کے دوران پیش آنے والے حادثے کے نتیجے میں 150 افراد جان سے ہاتھ دھو بیٹھے ۔ جنوبی کوریا کی وزارتِ ٹرانسپورٹ نے ایک بیان میں بتایا ہے کہ حادثہ اس وقت پیش آیا جب جیجو ایئر کی پرواز سی 22167 تھائی لینڈ کے دارالحکومت بنکاک سے 175 مسافروں اور عملے کے چھ ارکان کو لے کر مقامی وقت کے مطابق صبح نو بجے ملک کے جنوب میں واقع ایئرپورٹ پر لینڈ کر رہی تھی۔وزارت نے تقریبا تین دہائیوں میں جنوبی کوریا کی ایئر لائن کے سب سے تباہ کن فضائی حادثے میں ہلاکتوں کی تصدیق کی ہے۔موآن فائر چیف لی جنگ ہیون نے بریفنگ میں بتایا کہ عملے کے دو ارکان، ایک مرد اور ایک خاتون کو جلتے ہوئے طیارے کے ٹیل سیکشن سے بچا لیا گیا ہے۔ آگ دوپہر 1 بجے تک بجھا دی گئی۔ طیارے کو پہچاننا تقریبا ناممکن ہے۔مقامی پبلک ہیلتھ سینٹر کے سربراہ نے بتایا کہ عملے کے دو افراد کو شدید چوٹیں آئی ہیں اور وہ ہسپتالوں میں زیر علاج ہیں۔ایک اور فائر اہلکار نے بتایا کہ کم از کم 58 لاشیں نکال لی گئی ہیں لیکن یہ تعداد حتمی نہیں ہے۔اس سے قبل حادثے کے بعد ایئرپورٹ کے ایک اہلکار نے بتایا کہ حکام طیارے کے ٹیل سیکشن (پچھلے حصے ) میں لوگوں کو بچانے کے لیے کارروائیوں میں مصروف ہیں۔ مقامی میڈیا کی جانب سے شیئر کی گئی ویڈیو میں جڑواں انجن والے طیارے کو رن وے سے پھسلتے ہوئے دیکھا جا سکتا ہے جس کے بعد ممکنہ طور پر لینڈنگ گیئر میں خرابی کے باعث وہ حفاظتی باڑ سے ٹکرا کر آگ کے شعلوں کی لپیٹ میں آ جاتا ہے۔دیگر تصاویر میں طیارے کے کچھ حصوں میں آگ اور دھواں دیکھا جا سکتا ہے۔موآن فائر چیف لی جنگ ہیون کا کہنا ہے کہ تفتیش کار پرندوں کے حملے اور موسمی حالات کو ممکنہ عوامل کے طور پر دیکھ رہے ہیں۔ جنوبی کوریا کی نیوز ایجنسی یونہاپ نے ایئرپورٹ کے حکام کا حوالہ دیتے ہوئے کہا کہ پرندوں کے ٹکرانے کی وجہ سے لینڈنگ گیئر میں خرابی پیدا ہو سکتی ہے۔ ایک مسافر نے اپنے ایک رشتہ دار کو یہ بتانے کے لیے ٹیکسٹ میسیج بھیجا کہ ایک پرندہ ونگ میں پھنس گیا ہے۔ اس شخص کا آخری پیغام تھا کہ کیا میں اپنے آخری الفاظ کہوں؟وزارت نقل و حمل کے اعداد و شمار کے مطابق یہ حادثہ 1997 میں گوام میں کورین ایئر کے حادثے کے بعد سے کسی بھی جنوبی کورین ایئر لائن کو پیش آنے والا بدترین حادثہ ہے۔امریکی جزیرے گوام میں کورین ایئر کے حادثے میں 200 سے زائد افراد ہلاک ہوئے تھے۔ایوی ایشن ٹریکنگ سائٹ فلائٹ راڈار 24 نے کہا ہے کہ حادثے کا شکار ہونے والا جہاز بوئنگ طیارہ 737-800 معلوم ہوتا ہے تاہم، بوئنگ نے فوری طور پر تبصرے کی درخواست کا جواب نہیں دیا۔