سنجاوی، زیتون کے جنگلات میں آگ بھڑک اٹھی، سینکڑوں درخت جل کر خاکستر

سنجاوی(یو این اے )سنجاوی کے علاقے کلی اصغرہ میں زیتون کے قیمتی جنگلات میں اچانک آگ بھڑک اٹھی، جس کے نتیجے میں سینکڑوں درخت جل کر خاکستر ہو گئے۔ مقامی افراد اور لیویز فورس کے اہلکاروں نے انتھک محنت کے بعد آگ پر قابو پا لیا، جس سے زیتون کے جنگلات کو مزید تباہی سے بچا لیا گیا۔نائب رسالدار نور الحق کی قیادت میں لیویز اہلکاروں نے اپنی مدد آپ کے تحت آگ بجھانے کی کوشش کی۔ تاہم، فائر بریگیڈ کی عدم موجودگی کے باعث آگ پر قابو پانے میں شدید مشکلات کا سامنا کرنا پڑا۔مقامی افراد نے حکومت اور متعلقہ حکام سے مطالبہ کیا ہے کہ علاقے میں فائر بریگیڈ کی سہولت فراہم کی جائے تاکہ مستقبل میں قدرتی وسائل کو اس طرح کے نقصانات سے بچایا جا سکے۔ حکام نے واقعے کی تحقیقات شروع کر دی ہیں اور آگ لگنے کی وجوہات کا تعین کیا جا رہا ہے۔