ظالموں کو دنیا میں بھی ذلیل ہونے کیلئے بلند منصبوں پر بٹھایا جاتا ہے ،اللہ آصف زرداری اور میاں برادران پر رحم کرے،طاہر بزنجو

کوئٹہ(یو این اے ) نیشنل پارٹی کے مرکزی رہنما اور سابق سینیٹر میر طاہر بزنجو نے ایک ویڈیو بیان میں کہا کہ ایک شخص نے سوال کیا ہے کہ اللہ تعالی ظالموں کو بلند منصبوں پر کیوں بٹھاتا ہے۔ انہوں نے اس سوال کا جواب دیتے ہوئے کہا کہ یہ سوال بہتر تھا کہ کسی بڑے مذہبی سکالر یا دانشور سے کیا جاتا، مگر میری رائے میں، جو میں اسلامی تعلیمات کو سمجھ سکا ہوں، اللہ تعالی ظالموں کو بلند منصبوں پر اس لیے بٹھاتا ہے تاکہ وہ اس دنیا میں بھی ذلیل ہوں۔میر طاہر بزنجو نے مزید کہا کہ پاکستان کے تناظر میں جنرل ضیا الحق اور جنرل مشرف اس بات کی زندہ مثال ہیں، جنہوں نے ظالمانہ حکمرانی کی، اور جو کوئی بھی ان کے نقش قدم پر چلے گا، اسے بھی بدنامی اور رسوائی کے سوا کچھ حاصل نہیں ہوگا۔انہوں نے اختتاما کہا کہ اللہ تعالی صدر آصف علی زرداری اور میاں برادران پر رحم کرے۔