ژوب میں سیکورٹی فورسز کا کلیئرنس آپریشن، مزید 14 دہشت گرد ہلاک، آئی ایس پی آر

راولپنڈی (پ ر) سیکیورٹی فورسز نے بلوچستان کے ضلع ژوب کی تحصیل سمبازہ میں آپریشن کے دوران سرگرم مزید 14 دہشت گردوں کو ٹریس کر کے ہلاک کر دیا۔ فوج کے شعبہ تعلقات عامہ (آئی ایس پی آر) کے مطابق 8 اور 9 اگست کی شب پاک افغان سرحد کے قریب سمبازہ میں دہشت گردوں کی ہلاکت کے بعد کلیئرنس آپریشن کیا گیا، اس دوران سرگرم مزید 14 دہشت گرد ٹریس کر کے ہلاک کردیے گئے۔ آئی ایس پی آر کی جانب سے آگاہ کیا گیا ہے کہ کلیئرنس آپریشن میں ہلاک ہونے والوں سے اسلحہ، گولا بارود اور دھماکا خیز مواد بھی برآمد ہوا، 2 روزہ آپریشن میں ہلاک دہشت گردوں کی مجموعی تعداد بڑھ کر 47 ہوگئی۔