ڈیرہ اسماعیل خان پولیس ٹریننگ اسکول پر حملہ، خودکش سمیت 6 دہشتگرد ہلاک، 7 اہلکار شہید، متعدد زخمی ہوگئے، سی ٹی ڈی

پشاور (انتخاب نیوز) خیبر پختونخوا پولیس اور سیکورٹی فورسز نے پولیس ٹریننگ اسکول ڈیرہ اسماعیل خان پر حملہ ناکام بناتے ہوئے خودکش حملہ آور سمیت 6 دہشتگردوں کو ہلاک کردیا، واقعے میں شہید جوانوں کی تعداد 7 ہوگئی جبکہ 13 اہلکار زخمی ہوئے، دہشتگردوں نے پولیس ٹریننگ سینٹر کے قریب واقعے نادرا سینٹر کو بھی آگ لگا دی۔ محکمہ انسداد دہشت گردی (سی ٹی ڈی) کے مطابق گزشتہ شب ڈیرہ اسماعیل خان کے علاقے رتہ کلاچی میں واقع پولیس ٹریننگ اسکول پر دہشتگردوں نے رات گئے بھاری ہتھیاروں سے حملہ کیا، اسکول کی سیکورٹی پر مامور پولیس اہلکاروں نے جوابی کارروائی کرتے ہوئے دہشت گردوں کے مذموم عزائم کو خاک میں ملا دیا۔ دہشتگردوں نے بارود سے بھرا ٹرک پولیس ٹریننگ اسکول کے گیٹ سے ٹکرا یا جس سے اسکول کی دیوار گر گئی اور سیکورٹی پر مامور ایک اہلکار ملبے تلے دب کر شہید ہوگیا۔ بعد ازاں مختلف یونیفارمز میں ملبوس دہشتگرد اسکول کے اندر داخل ہوگئے اور بھاری ہتھیاروں سے فائرنگ شروع کردی جس پر سیکورٹی پر مامور ایک اور اہلکار نے بڑی بہادری سے دہشت گردوں پر فائرنگ کی۔ دہشت گرد پولیس پر دستی بموں سے حملہ آور ہوئے جس سے وہ اہلکار بھی جام شہادت نوش کرگیا، پولیس اور مسلح افراد کے درمیان فائرنگ کا تبادلہ کئی گھنٹے جاری رہا، حملہ آور مسلسل دستی بم پھینکتے رہے، دہشتگردوں نے پولیس ٹریننگ سینٹر کے قریب واقعے نادرا سینٹر کو بھی آگ لگادی۔ پولیس اور دیگر سیکورٹی فورسز نے مشترکہ طور پر 5 گھنٹے طویل آپریشن میں 5 دہشت گردوں کو ہلاک کردیا، دہشت گردوں کے قبضہ سے خودکش جیکٹس، بارودی مواد، اسلحہ اور ایمونیشن برآمد کرلیا گیا۔ دہشت گردوں سے مقابلے میں 7 پولیس اہلکاروں نے جام شہادت نوش کیا جبکہ 13 اہلکار زخمی ہوگئے جنہیں طبی امداد کے لیے فوراً ہسپتال منتقل کر دیا گیا، آپریشن کے دوران ٹریننگ سینٹر میں موجود تمام زیر تربیت ریکروٹس کو بحفاظت محفوظ مقام پر منتقل کر کے ایک بڑے سانحے سے بچا لیا گیا۔ سی ٹی ڈی کے مطابق شہدا میں کانسٹیبل مدثر، کانسٹیبل جلال، دانیال، لانگری عصمت اللہ، کانسٹیبل انور، ریکروٹ کانسٹیبل فرحان اللہ اور لیویز کی کوہاٹ پلاٹون کا نامعلوم ہیڈ کانسٹیبل شامل ہے۔ سی ٹی ڈی کے مطابق زخمیوں میں کانسٹیبل نصیر محمد، کانسٹیبل محمد شعیب، کانسٹیبل حضرت علی، کانسٹیبل یعقوب، کانسٹیبل سلیم، کانسٹیبل صدام حسین، سعید الرحمٰن، کانسٹیبل امان اللہ ، کانسٹیبل عبداللہ، ریکروٹ کانسٹیبل مدثر، عصمت عباس، ریکروٹ کانسٹیبل یاسر اور ریکروٹ کانسٹیبل اعجاز احمد شامل ہیں۔ ڈی پی او ڈیرہ اسماعیل خان نے بتایا کہ ٹریننگ اسکول میں ٹریننی اور اساتذہ و اسٹاف سمیت 200 کے قریب افراد موجود تھے جنہوں ریسکیو کرلیا گیا ہے۔