ریکوڈک مائننگ کمپنی اور نوکنڈی ٹریڈرز ایسوسی ایشن کے درمیان مقامی کاروبار اور تربیتی اقدامات کے فروغ پر اتفاق

نوکنڈی(نامہ نگار) ریکوڈک مائننگ کمپنی آر ڈی ایم سی) اور نوکنڈی ٹریڈرز ایسوسی ایشن کے درمیان مقامی کاروباری سرگرمیوں کے فروغ، تربیتی پروگراموں کے انعقاد اور خطے کے تاجروں کی پیشہ ورانہ صلاحیتوں میں اضافے کے لیے ایک اہم اجلاس منعقد ہوا۔ اجلاس میں آر ڈی ایم سی کے سینئر پروکیورمنٹ افسیران جوان ایلسن،حفیظ بلوچ ، کمیونٹی ریلشنز ڈیپارٹمنٹ کے لیڈ حاجی گل خان نصیر، سینئر کمیونیکیشن آفیسر نصیب ملک اور نوکنڈی ٹریڈرز ایسوسی ایشن کے نمائندوں نے شرکت کی۔ اجلاس کے دوران اس بات پر اتفاق کیا گیا کہ آر ڈی ایم سی مقامی تاجروں کے لیے خصوصی تربیتی پروگرام ترتیب دے گی، جن میں بین الاقوامی کاروباری معیارات، مالیاتی نظم و نسق، سپلائی چین کے جدید طریقہ کار اور سیفٹی کے اصول جیسے موضوعات شامل ہوں گے۔ ان پروگراموں کا مقصد مقامی کاروباری افراد کو وہ مہارتیں فراہم کرنا ہے جو انہیں ریکوڈک جیسے بڑے منصوبوں میں مو¿ثر اور مسابقتی شمولیت کے قابل بنائیں۔ ریکوڈک مائننگ کمپنی کے سپلائی چین مینیجر جوان ایلسن نے کہا ہمارا مقصد یہ یقینی بنانا ہے کہ چاغی کے عوام ریکوڈک منصوبے میں فعال شراکت دار ہوں اور اس کے حقیقی مستفید بنیں۔ مقامی تاجروں کے ساتھ مضبوط شراکت داری اس مشترکہ وڑن کے حصول کی کلید ہے۔ کمیونٹی ریلشن ڈیپارٹمنٹ کے لیڈ حاجی گل خان نصیر نے کہا کہ پائیدار ترقی کا آغاز مقامی افراد کو بااختیار بنانے سے ہوتا ہے۔ نوکنڈی کے تاجروں اور سپلائرز کو تربیت اور مواقع فراہم کر کے ہم خطے کی مجموعی ترقی اور طویل المدتی معاشی استحکام کی بنیاد رکھ رہے ہیں۔ نوکنڈی ٹریڈرز ایسوسی ایشن نے آر ڈی ایم سی کے اس اقدام کا خیرمقدم کرتے ہوئے کہا کہ یہ تعاون مقامی کاروباری صلاحیت میں اضافہ کرے گا، مسابقتی معیار کو بہتر بنائے گا اور چاغی بھر میں روزگار کے نئے مواقع پیدا کرے گا۔ آر ڈی ایم سی حکام نے اس عزم کا اعادہ کیا کہ وہ مقامی کاروباروں کو اپنی سپلائی چین کا حصہ بنائے گی اور اس بات کو یقینی بنائے گی کہ خطے کے تمام اسٹیک ہولڈرز ریکوڈک منصوبے کے فوائد سے براہِ راست مستفید ہوں۔