ملک کے مختلف شہروں سے گاڑیاں چھیننے والے گروہ کے 3 ارکان مقابلے میں مارے گئے، کوئٹہ پولیس

کوئٹہ (آئی این پی) کوئٹہ پولیس نے دعویٰ کیا ہے کہ کراچی سمیت ملک کے مختلف شہروں سے گاڑیاں چھیننے والے گروہ کے 3 ارکان کوئٹہ میں ایک پولیس مقابلے میں مارے گئے ہیں۔ایس ایچ او پو لیس تھا نہ جناح ٹاﺅن ظہور احمد کے مطابق سیریس کرائم انویسٹی گیشن ونگ کے اہلکاروں اور ملزمان کے درمیان جناح ٹاﺅن تھانے کی حدود میں سی پیک روڈ پر فائرنگ کا تبادلہ ہوا۔پولیس کے مطابق ہلاک ہونے والوں کی شناخت ساجد حسین، محمد پناہ اور شہزاد علی کے نام سے ہوئی ہے جو بلوچستان کے ضلع جھل مگسی اور بلوچستان سے ملحقہ سندھ کے علاقے جیکب آباد کے رہائشی تھے۔ ڈی آئی جی پولیس کوئٹہ عمران شوکت نے گزشتہ ہفتے پریس کانفرنس میں بتایا تھا کہ کراچی سمیت سندھ اور دیگر صوبوں سے شکایات موصول ہو رہی تھیں کہ وہاں سے چوری اور چھینی گئی گاڑیاں بلوچستان میں فروخت کی جا رہی ہیں۔ان کے بقول ان شکایات کی روشنی میں سیریس کرائمز انویسٹی گیشن ونگ کو ٹاسک دیا گیا جس نے تین ہفتے سے زائد مانیٹرنگ اور انٹیلی جنس معلومات کے بعد ایک بڑا آپریشن کیا۔ اس دوران 20گاڑیاں برآمد کی گئیں اور چار افراد گرفتار ہوئے۔ کوئٹہ پولیس کے ایک سینئر افسر نے نام ظاہر نہ کرنے کی شرط پر میڈیا کوبتایاہے کہ یہ افراد ایک بین الصوبائی جرائم پیشہ گروہ لاشاری گروپ سے تعلق رکھتے تھے جو سندھ اور پنجاب میں پولیس کو گاڑیاں چھیننے، چوری اور ڈکیتی کے 172مقدمات میں مطلوب تھے۔پولیس کے مطابق یہ گروہ کراچی، سندھ اور پنجاب کے مختلف علاقوں سے گاڑیاں چوری کرکے مختلف راستوں سے بلوچستان منتقل کرتا تھا جہاں انہیں ایک دوسرے گروہ کے ذریعے فروخت کیا جاتا تھا۔لین دین وٹس ایپ گروپس اور کرپٹو کرنسی کے ذریعے کیا جاتا تھا تاکہ اس کا سراغ نہ لگایا جا سکے۔پولیس نے بتایا کہ اب تک اس گروہ سے 26گاڑیاں کوئٹہ سے برآمد کی جا چکی ہیں جن میں سے زیادہ تر کراچی سے چھینی گئی تھیں۔