عاشقی’ فیم اداکار کارگل پر شوٹنگ کے دوران دماغی فالج کا شکار

بولی وڈ کی میوزیکل رومانٹک فلم ‘عاشقی’ سے شہرت حاصل کرنے والے بولی وڈ اداکار 52 سالہ راہل رائے کارگل کی اونچائی پر شوٹنگ کے دوران دماغی فالج کا شکار بن گئے۔

فلم ساز مہیش بھٹ کی مذکورہ میوزیکل رومانٹک فلم اتنی مقبول ہوئی کہ آج بھی لوگ اس کے سحر میں ڈوبے ہوئے ہیں، تاہم 2013 میں اس کا ریمیک بھی بنایا گیا تھا۔’عاشقی’ کے ریمیک میں ادتیہ رائے کپور اور شردھا کپور نے مرکزی کردار ادا کیے تھے، تاہم ریمیک کے باوجود لوگ پہلی فلم کو نہیں بھلا پائے۔

‘عاشقی’ کو جہاں اس کی رومانوی کہانی کی وجہ سے پسند کیا گیا، وہیں اسےگانوں کی وجہ سے بھی شہرت حاصل ہوئی اور فلم نے میوزک کے چار بڑے فلم فیئر ایوارڈز بھی جیتے تھے۔

‘عاشقی’ کے مقبول گانوں میں ‘میں دنیا بھلا دوں گا، تو میری زندگی ہے، دل کا عالم، اب تیرے بن، نظر کے سامنے اور بس اک صنم چاہیے’ شامل تھے۔تاہم مذکورہ فلم میں اس کے علاوہ بھی کچھ گانے شامل تھے، جنہیں آج بھی بولی وڈ کے مقبول گیت مانا جاتا ہے۔

راہل رائے نے اگرچہ ‘عاشقی’ سے قبل ہی فلمی کیریئر کا آغاز کیا تھا، تاہم انہیں شہرت مذکورہ فلم سے ہی ملی۔راہل رائے نے اب تک 4 درجن کے قریب فلموں میں کام کیا ہے اور ان دنوں وہ آنے والی ایک فلم کی شوٹنگ کے لیے کارگل میں موجود تھے۔

بھارتی اخبار انڈین ایکسپریس کے مطابق کارگل کے اونچے مقام پر زیادہ ٹھنڈ اور سانس لینے میں دشواری کے باعث راہل رائے دماغی فالج کا شکار ہوگئے، جس وجہ سے فلم کی شوٹنگ کو روک دیا گیا۔

راہل رائے کو کارگل کی اونچائی سے بڑی کوششوں کے بعد مقبوضہ کشمیر کے شہر سری نگر لایا گیا، جہاں سے ایمبولینس کے راستے انہیں ریاست مہاراشٹر کے شہر ممبئی کے نجی ہسپتال میں پہنچایا گیا۔رپورٹ کے مطابق راہل رائے کو دماغی فالج پر شدید حملہ ہوا اور ان کے ذہن کے ایک حصے میں خون جم گیا ہے، جس وجہ سے وہ بے ہوش ہوگئے۔

راہل رائے کو انتہائی نگہداشت کے وارڈ (آئی سی وی) میں داخل کرادیا گیا ہے، جہاں کئی گھنٹوں بعد ان کی صحت میں کچھ بہتری کی امید دکھائی دی ہے۔راہل رائے پر دماغی فالج کے حملے پر کئی شوبز شخصیات نے دکھ کا اظہار کرتے ہوئے ان کی صحت یابی کے لیے نیک خواہشات کا اظہار کیا۔