سندھ ثقافت ریلی، کراچی میں شرکا اور پولیس کے درمیان تصادم، مظاہرین کا پتھراﺅ، اہلکاروں کا لاٹھی چارج اور شیلنگ
کراچی (ویب ڈیسک) کراچی کے علاقے شارع فیصل پر سندھ ثقافت سے متعلق ریلی کے شرکا اور پولیس میں تصادم، ریلی کے شرکاءنے گاڑیوں پر پتھراﺅ شروع کردیا جس کے جواب میں پولیس نے لاٹھی چارج کیا جس کے بعد شارع فیصل ایف ٹی سی کے مقام سے بند اور پولیس کی بھاری نفری تعینات کردی گئی جبکہ دیگر شاہراہوں پر گاڑیوں کی قطاریں لگ گئیں۔ اتوار کو کراچی کے علاقے شارع فیصل پر ایف ٹی سی کے قریب سندھ ثقافت سے متعلق ریلی کے شرکا اور پولیس کے درمیان تصادم ہوگیا۔ شارع فیصل ایف ٹی سی پل کے قریب ریلی میں شامل کچھ شرپسند عناصر نے شدید ہنگامہ آرائی کی جبکہ نامعلوم افراد نے مسافر بسوں پر پتھراﺅ کیا، خواتین کو ہراساں کیا اور سرکاری املاک کو نقصان پہنچایا۔ شرکا شارع فیصل سے کراچی پریس کلب کی طرف جارہے تھے، پولیس نے شرکا کو متبادل راستے کی جانب جانے کی ہدایت کی، جس پر ریلی کے شرکا نے متبادل راستے سے جانے سے انکار کردیا۔ جس کے بعد پولیس اور ریلی کے شرکا کے درمیان تکرار ہوگئی اور مظاہرین نے گاڑیوں پر پتھراﺅ شروع کردیا، جس سے متعدد گاڑیوں کے شیشے ٹوٹ گئے۔ جس کے جواب میں پولیس نے مظاہرین کو منتشر کرنے کے لیے لاٹھی چارج کیا اور شیلنگ بھی کی۔ سیکورٹی خدشات کے پیش نظر شارع فیصل ایف ٹی سی کے مقام سے بند کردیا گیا جب کہ شارع فیصل پر گاڑیوں کی قطاریں لگ گئی جس کے باعث ٹریفک جام ہوگیا۔
