سہیل آفریدی اڈیالہ جیل آئے تو پہلے ناکے سے واپس بھیج دیا جائیگا، عمران خان کی بہنوں کی گرفتاری خارج از امکان نہیں، عطا تارڑ

اسلام آباد (ویب ڈیسک) وفاقی وزیر اطلاعات و نشریات عطا اللہ تارڑ نے کہا ہے کہ اگر پاکستان تحریک انصاف (پی ٹی آئی) والے کہیں کہ وہ بانی عمران خان کے بیانیے کے ساتھ نہیں کھڑے تو ان سے بات ہو سکتی ہے۔ میڈیا رپورٹس کے مطابق اپنے ایک بیان میں عطا اللہ تارڑ نے کہا کہ وزیر اعلیٰ خیبر پختونخوا اڈیالہ آئے تو انہیں واپس جانے کا کہا جائے گا۔ وزیر اطلاعات کا کہنا تھا کہ سہیل آفریدی کو پہلے ناکے سے ہی واپس بھیج دیا جائےگا، بانی پی ٹی آئی عمران خان کی بہنیں آئیں تو ان کی گرفتاری کوبھی خارج ازامکان قرار نہیں دیا جا سکتا۔ ایک انٹرویو میں عطا تارڑ کا کہنا تھا کہ ملک کو داﺅ پر لگانے کی اجازت نہیں دی جاسکتی۔ انہوں نے مزید کہا کہ اگر پی ٹی آئی والے کہیں کہ وہ تحریک انصاف کے بانی عمران خان کے بیانیے کے ساتھ نہیں تو ان سے بات ہو سکتی ہے۔