پاکستان میں سوشل میڈیا پلیٹ فارمز پر غیر اخلاقی اور نفرت انگیز مواد پھیلانے والے لاکھوں لنکس بلاک کردیے، پی ٹی اے

اسلام آباد (ویب ڈیسک) پاکستان ٹیلی کمیونیکیشن اتھارٹی نے کریک ڈاﺅن سے متعلق رپورٹ عدالت میں جمع کروا دی، جس کے مطابق ملک بھر میں بیہودگی اور اخلاقیات کیخلاف مواد سرفہرست ہیں۔ رپورٹ کے مطابق غیرقانونی ڈیجیٹل مواد پھیلانے پرایک ملین سے زائد ویب لنکس اور یو آر ایل بلاک کیے گئے جن میں فیس بک اور ٹک ٹاک پر غیرقانونی اور نامناسب مواد شیئرکرنے پرسب سےزیادہ بلاکنگ کی گئی۔ رپورٹ میں بتایا گیا ہے کہ پی ٹی اے نے فیس بک کے 2 لاکھ 29 ہزار لنکس چیک کرکے رپورٹ کیے اور ایک لاکھ97 ہزار بلاک ہوئے، انسٹاگرام پر 43 ہزار یو آر ایل چیک کیے گئے جس کے بعد 38 ہزار بند کردیے گئے، اس کا بلاکنگ ریٹ 87 فیصد رہا۔ رپورٹ کے مطابق ٹک ٹاک کے ایک لاکھ 74 ہزار سے زائد غیرقانونی مواد کے لنکس چیک کیے گئے، ایک لاکھ 63 ہزار سے زائد ٹک ٹاک وڈیوز کے لنکس بند کیے گئے، ٹک ٹاک پر سب سے سخت کریک ڈاﺅن ہوا اور 94 فیصد مواد بلاک ہوا۔ اسی طرح یوٹیوب پر 72 ہزار لنکس کی جانچ پڑتال کی گئی جن میں 64 ہزار سے زائد لنکس بلاک کیے گئے، ایکس کے ایک لاکھ 12 ہزار سے زائد لنکس چیک کیے گئے جن میں سے70 ہزار 800 لنکس بلاک کیے گئے۔ رپورٹ کے مطابق ایکس پر بلاکنگ ریٹ سب سے کم رہا جہاں صرف 62 فیصد مواد بلاک کیا جاسکا جبکہ دیگر مختلف پلیٹ فارمز پر8 لاکھ 98 ہزار لنکس کی چیکنگ کی گئی جس میں سے 8 لاکھ 91 ہزار لنکس بلاک کردیے گئے۔ رپورٹ کے مطابق توہین عدالت، بیہودگی، مذہب کیخلاف، پراکسی اور نفرت انگیز مواد کے14 لاکھ سے زائد لنکس اور یو آر ایل بند کیے گئے۔ رپورٹ میں مزید بتایاگیا ہے کہ بیہودگی اور اخلاقیات کیخلاف مواد سرفہرست رہا، 10 لاکھ 61 ہزار سے زائد لنکس بلاک کیے گئے، ریاست اور دفاع پاکستان کیخلاف ایک لاکھ 48 ہزار لنکس بلاک کیے گئے، مذہب کے خلاف مواد پر ایک لاکھ 9 ہزار سے زائد لنکس بند کیے گئے جبکہ فرقہ وارانہ اور نفرت انگیز مواد پر 76 ہزار لنکس بلاک کیے گئے۔