’ہم اس دنیا میں آئے ہیں تو کچھ نہ کچھ تو اچھا کر کے جانا چاہیے‘بالی ووڈ کے مشہور اداکار نانا پاٹیکر انتقال کرگئے

بالی ووڈ کے مشہور سینئر اداکار نانا پاٹیکر 75 برس کی عمر میں چل بسے۔ بھارتی میڈیا کے مطابق نانا پاٹیکر کو جمعرات کی صبح بے ہوشی کی حالت میں گوا کے ایک اسپتال منتقل کیا گیا تھا جہاں ڈاکٹروں نے ان کی موت کی تصدیق کردی۔نانا پاٹیکر کو گوا میں واقع اپنے فلیٹ میں سینے میں شدید درد کی شکایت سامنے آئی تھی جس کے بعد انہیں طبی عملے نے ایمرجنسی میں اسپتال منتقل کیا۔نانا پاٹیکر کے بیٹے ملہار پاٹیکر کا کہنا ہے کہ اداکار کو سینے میں شدید درد کی شکایت پر میڈیکل ٹیم کو ان کے فلیٹ پر بھیجا گیا تھا، اس وقت تک وہ بے ہوش تھے۔بعد ازاں انہیں فوراً اسپتال منتقل کیا گیا، جہاں ڈاکٹروں نے صبح 5 بج کر 20 منٹ پر ان کی موت کی تصدیق کی۔نانا پاٹیکر کا اصل نام وشواناتھ پاٹیکر تھا، وہ ہندی اور مراٹھی سنیما کے انتہائی باوقار اداکاروں میں شمار ہوتے تھے۔نانا پاٹیکر نے 1978ء میں فلمی کیریئر کا آغاز کیا، انہوں نے ’پرندہ‘، ’کرانتی ویر‘، ’اگنی ساکشی‘، ’خاموشی: دی میوزیکل‘، ’اب تک چھپن‘ اور ’ویلکم‘ سمیت کئی فلموں میں اداکاری کے جوہر دکھائے۔

نانا پاٹیکر نے موت سے صرف 4 روز قبل گوا میں ایک تقریب سے خطاب کرتے ہوئے زندگی کے فانی ہونے کے بارے میں بات کی تھی۔نانا پاٹیکر نے 4 اکتوبر کو ساحلی علاقے ڈونا پاؤلا میں منعقدہ ’سمراٹ کلب انٹرنیشنل‘ کی تقریب میں شرکت کی تھی۔انہوں نے اس تقریب سے خطاب کے دوران اپنے آنجہانی دوست اور گوا کے سابق وزیرِ اعلیٰ منوہر پاریکر کو یاد کرتے ہوئے زندگی کے بارے میں کہا کہ ہر انسان کو ایک دن دنیا سے جانا ہے اور مجھے نہیں معلوم کہ میں بھی کل تک زندہ ہوں گا یا نہیں۔انہوں نے نوجوانوں کو تلقین کرتے ہوئے کہا کہ اہم یہ ہے کہ کیا انسان اپنی زندگی ختم ہونے سے پہلے وہ سب کچھ کر سکا جو وہ کرنا چاہتا تھا یا نہیں، اگر انسان کی زندگی صرف اس کے گھر والوں تک ہی محدود رہی تو پھر اس کی زندگی کا مقصد کیا ہے؟ ہم اس دنیا میں آئے ہیں تو کچھ نہ کچھ تو اچھا کر کے جانا چاہیے۔