’والد نے کہہ دیا تھاکہ اگر گلوکاری کرو تو میرا نام اپنے نام کے آگے سے ہٹالینا،آئمہ بیگ‘

پاکستان کی معروف گلوکارہ آئمہ بیگ کی خوبصورت آوازاور ان کے مشہور گانوں سے متعلق تو سب ہی جانتے ہوں لیکن شاید بہت کم لوگ یہ جانتے ہوں کہ آئمہ بیگ کا تعلق ایک بہت مذہبی گھرانے سے ہے۔
آئمہ بیگ میرا سیٹھی ویب شو کو دیے گئے انٹرویو کے دوران گلوکاری میں انٹری سے قبل پیش آنے والی مشکلات کا ذکر کرچکی ہیں ۔
آئمہ بیگ کا کہنا تھا کہ مذہبی گھرانےسے تعلق رکھتی ہوں لہٰذا میرے لیے والد کو یہ بتانا کہ میں گلوکاری کرنا چاہتی ہوں بے حد مشکل مرحلہ تھا۔
گلوکارہ کے مطابق جب انھوں نے والد کو یہ بات بتائی کہ وہ گلوکارہ بننا چاہتی ہیں تو انھوں نے آئمہ سے کہا کہ اگر ایسا ہے تو آپ اپنے نام کے آگے ان کا نام (بیگ ) ہٹا لیجیے گا۔
آئمہ کے مطابق لیکن وہ آغاز میں گلوکاری کے حوالے سے بہت جذباتی تھیں ,لہٰذا والد سے کہا کہ وہ ہٹالیں گی یہ نام ، لیکن بعد ازاں وہ بہت روئیں ۔
گلوکارہ نے مزید بتایا کہ ان کے والد بھی گلوکاری کے بہت شوقین تھے لیکن اس کے باوجود وہ ان کی گلوکاری کے خلاف تھے۔