بھارت میں جمہوریت تباہ ہوکر رہ گئی ہے، یشونت سنہا

رانچی (مانیٹرنگ ڈیسک) بھارت میں صدارتی انتخابات میں اپوزیشن جماعتوں کے مشترکہ امیدوار یشونت سنہا نے کہا ہے کہ ملک میں جمہوریت تباہ ہو کر رہ گئی ہے۔ بھارتی میڈیاکے مطابق یشونت سنہانے جو اٹل بہاری واجپائی کابینہ میں وزیر اور ہزاری باغ سے رکن پارلیمنٹ تھے، جھارکھنڈ مکتی مورچہ کے ایگزیکٹو صدر اور ریاست کے وزیر اعلی ہیمنت سورین سے ملاقات کرکے حمایت کی درخواست کی۔انہوں نے18جولائی کے صدارتی انتخابات سے پہلے کانگریس کے ارکان پارلیمنٹ کے ایک اجلاس میں بھی شرکت کی۔ یشونت سنہا نے بعد میں ایک پریس کانفرنس سے خطاب کرتے ہوئے کہاکہ جب میں نے گزشتہ ماہ صدارتی انتخابات کے لیے مہم کا آغاز کیاتھا تو میں نے کہا تھا کہ جمہوریت خطرے میں ہے لیکن اب جب میں مہم کا اختتام کر رہا ہوں میں کہہ سکتا ہوں کہ ملک میں جمہوریت تباہ ہو چکی ہے۔ انہوں نے کہا کہ میں ووٹرز(الیکٹورل کالج)سے اپیل کرتا ہوں کہ وہ اپنے ضمیر کی آواز سن کر اپنا حق رائے دہی استعمال کریں۔ یشونت سنہا جن کا تعلق جھارکھنڈ سے ہے۔