اوستہ محمد اور دادو میں بچاﺅ بند پر کٹ لگا دیے گئے، آبادی ڈوبنے کا خدشہ

اوستہ محمد، دادو (انتخاب نیوز) فیض آباد کے مقام پر رند برادری نے جو گنداخہ روڈ کو زبردستی کٹ لگایا اسے فوری بند کر کے زمینی راستہ بحال کیا جائے، متاثرین کا مطالبہ۔ اس کٹ سے گنداخہ، جعفرآباد، جمالی باغ ہیڈ، سبی جدید، گنداخہ، جنگ دوست، باغ ٹیل اور کئی سینکڑوں گوٹھ اوستہ شہر سے کٹ گئے۔ علاقہ مکین غذائی اجناس، خوراک، علاج معالجے سمیت تمام ضروریات زندگی سے محروم ہوگئے۔ گنداخہ شہر میں پینے کے پانی کی بھی شدید قلت ہو گئی ہے عوام نے ڈپٹی کمشنر پر کڑی نقطہ چینی کرتے ہوئے کہا کہ وہ با اثر وڈیروں کا خدمت گزار بنے ہوئے ہیں عوام سے ان کو کوئی سروکار نہیں ہے اس ڈی سی سے کوئی امید کی توقع نہیں ہے اس کے فوری تبادلے کا بھی مطالبہ کیا ہے۔ علاوہ ازیں ضلع دادو میں جوہی بیراج کوکاری موری کے مقام پر کٹ لگا دیا گیا۔ ضلع انتظامیہ کے مطابق بیراج میں کٹ کے بعد سیلابی پانی جوہی کی طرف بڑھ رہا ہے اور جوہی شہر کے ڈوبنے کا خدشہ ہے۔ مین نارا ویلی ڈرین میں تین مختلف مقامات پر شگاف ڈال دیے گئے اور تینوں شگافوں سے نکلنے والا سیلابی ریلا تیزی کے ساتھ جوہی کی طرف بڑھ رہا ہے جبکہ شگافوں کے باعث 65 سے زائد دیہات زیر آب آگئے ہیں۔ تینوں شگاف گاو¿ں چھپر جمالی، کلھوڑو اور خیر محمد لغاری پر لگائے گئے، سیم نالے کو چھپر جمالی کے مقام پر پڑنے والا شگاف 800 فٹ چوڑا ہوگیا اور گاو¿ں خیر محمد لغاری اور کلھوڑو کے مقام پر پڑنے والے شگاف بھی 200 فٹ چوڑے ہو گئے۔ سیم نالوں کے شگافوں کا سیلابی ریلا بارش کے کھڑے پانی میں شامل ہونے سے دباو¿ کی شدت میں اضافہ ہوگیا ہے اور جوہی شہر کے حفاظتی رنگ بند کی کمزور ہونے کے باعث شہریوں میں خوف ہراس پھیل گیا۔ ذرائع کے مطابق میہڑ اور خیرپورناتھن شاہ کی فصلیں بچانے کیلئے کٹ لگائے گئے ہیں اور متاثرہ دیہات سے آبادی کی نقل مکانی جاری ہے۔