آرمی چیف سے سفیر یورپی یونین کی ملاقات، سیلاب متاثرین کیلئے ہر ممکن امداد کی پیشکش

راولپنڈی (انتخاب نیوز) آرمی چیف جنرل قمر جاوید باجوہ سے یورپی یونین کی سفیر ڈاکٹر رینا کیونکا کی ملاقات، باہمی دلچسپی، علاقائی سیکیورٹی کی صورتحال سمیت یورپی یونین کے ساتھ تعاون پر تبادلہ خیال، آرمی چیف نے پاکستان اور یورپی یونین کے درمیان مختلف شعبوں میں تعاون کو مزید وسعت دینے کی ضرورت پر زور دیا۔ فوج کے شعبہ تعلقات عامہ (آئی ایس پی آر) کے مطابق فوج کے سربراہ جنرل قمر جاوید باجوہ سے یورپی یونین کی سفیر ڈاکٹر رینا کیونکا نے جی ایچ کیو راولپنڈی میں ملاقات کی، جس کے دوران باہمی دلچسپی کے امور، علاقائی سکیورٹی کی صورتحال اور یورپی یونین کے ساتھ دوطرفہ تعاون پر تبادلہ خیال کیا گیا، آرمی چیف جنرل قمر جاوید باجوہ نے کہا کہ پاکستان یورپی یونین کے ممالک کے ساتھ اپنے تعلقات کو خصوصی اہمیت دیتا ہے اور مشترکہ مفادات کی بنیاد پر مختلف شعبوں میں تعلقات کو وسعت دینے کے خواہاں ہیں، جنرل قمر جاوید باجوہ نے یورپی یونین کی سفیر کو نئی ذمہ داریاں سنبھالنے پر مبارکباد بھی دی، دونوں جانب سے مشترکہ مفادات کی بنیاد پر دوطرفہ روابط کو مزید بڑھانے پر زور دیا گیا، یورپی یونین کی سفیر نے پاکستان میں بدترین سیلاب سے ہونے والی تباہی پر گہرے دکھ کا اظہار کرتے ہوئے متاثرین کے اہل خانہ سے دلی تعزیت کی، انہوں نے پاکستانی عوام کو مکمل تعاون کی پیشکش کی، انہوں نے سیلاب سے متاثرہ علاقوں میں ریسکیو اور ریلیف کی کوششوں میں سول انتظامیہ کی مدد کرنے پر فوج کی کوششوں کو بھی سراہا۔ سفیر نے پاکستان اور یورپی یونین کے درمیان تعلقات کو فروغ دینے میں اپنا کردار ادا کرنے کے عزم کا اعادہ کیا۔ جنرل قمر جاوید باجوہ نے توقع ظاہر کہ یورپی یونین اور عالمی شراکت داروں کی مدد سے متاثرین کی جلد بحالی ممکن ہو سکے گی۔