یوکرین کی خصوصی سروسز نے منصوبہ بندی اہم پل کو دھماکے سے اڑایا، روس کا الزام

ماسکو (مانیٹرنگ ڈیسک) روس کے صدر ولادی میر پیوٹن نے جزیرہ نما کریمیا اور روسی سرزمین کو ملانے والے ایک اہم پل پردھماکے کا الزام یوکرین پرعاید کیا ہے اور کہا ہے کہ اس کی خصوصی سروسز نے تخریب کاری کی منصوبہ بندی کی تھی۔ صدر پیوٹن نے کریملن کے ٹیلی گرام چینل پرایک ویڈیو میں کہا کہ اس میں کوئی شک نہیں،یہ تخریب کاری کی ایک کارروائی ہے۔اس کا مقصد انتہائی اہم سویلین انفراسٹرکچر کوتباہ کرنا تھا۔انھوں نے کہا کہ اس حملے کا منصوبہ یوکرین کی خصوصی سروسز نے تیار کیا تھا، اسی نے اس پر عمل کیا اور اس کا حکم دیا تھا۔ انھوں نے یہ باتیں روس کی تحقیقاتی کمیٹی کے سربراہ الیگزینڈر باسٹریکن سے ملاقات میں کہی ہیں۔ انھوں نے صدر پیوٹن کو ہفتے کے روز پل پر ہونے والے دھماکے اوراس کے بعد لگنے والی آگ کے واقعے کی تحقیقات کے نتائج پیش کیے ہیں۔ روسی حکام نے گذشتہ روز اس پل پر دھماکے میں تین افراد کی ہلاکت کی اطلاع دی تھی اور کہا تھا کہ ان میں ممکنہ طورپردھماکے میں تباہ شدہ ٹرک کے قریب سفرکرنے والی ایک کار میں سوار افراد بھی شامل ہیں۔اس دھماکے کے قریبا 10 گھنٹے کے بعد پل کو ریل ٹریفک کے لیے دوبارہ کھول دیا گیا تھا اور ملحقہ سڑک پر بھی ٹریفک بحال کردیا گیا تھا۔یہ پل روسی فوج کی رسد کے لیے ایک اہم شریان کی حیثیت رکھتا ہے۔روسی فوج نے یوکرین کے جنوبی خطے خیرسن کے بیشتر حصے پر قبضہ کررکھا ہے۔یہ پل سیفستوپول کی بحری بندرگاہ کے لیے بھی اہمیت کا حامل ہے۔واضح رہے کہ آبنائے کرچ پرواقع اس پل پرہفتہ کی صبح دھماکے کے بعد یوکرین کے حکام نے خوشی کے پیغامات جاری کیے تھے لیکن انھوں نے اس کی براہ راست ذمہ داری قبول نہیں کی جبکہ روس نے بھی فوری طور پراس کا کسی پرکوئی الزام عاید نہیں کیا تھا۔