سانحہ اے پی ایس کا غم برسوں بعد بھی بھلایا نہیں جاتا، شہباز شریف

اسلام آباد(انتخاب نیوز)وزیراعظم شہباز شریف نے کہا ہے کہ 16 دسمبر تخریب کاری کے خلاف پورے پاکستان کے ایک آواز ہونے کا دن ہے،سانحہ اے پی ایس کا غم برسوں بعد بھی بھلایا نہیں جاتا، پاکستانی قوم اپنوں قربانیاں کبھی فراموش نہیں کرے گی۔ سانحہ اے پی ایس پر اپنے پیغام میں وزیراعظم شہباز شریف نے لکھا کہ ہر سال 16 دسمبر کا دن پوری قوم کو اس کرب اور دکھ کی یاد دلاتا ہے جب تخریب کاروں نے آرمی پبلک اسکول پشاور میں ظلم کی داستان رقم کی۔پورے پاکستان سمیت دنیا بھر میں مقیم پاکستانی سانحے میںجاں بحق ہونے والے بچوں اور اساتذہ کو خراج تحسین پیش کررہے ہیں، شہباز شریف نے اپنی ٹوئٹ میں لکھا کہ برسوں بعد بھی غم ہے کہ بھلایا نہیں جاتا،16 دسمبر سانحہ آرمی پبلک اسکول کے جاں بحق بچوں سے عقیدت اور ان کے لواحقین کا غم بانٹنے کا دن ہے، پاکستانی عوام اپنوں کی قربانیاں کبھی فراموش نہیں کرے گی۔ وزیراعظم نے سوشل میڈیا پیغام میں کہا کہ 16 دسمبر تخریب کاری کے خلاف پورے پاکستان کے ایک آواز ہونے کا دن ہے، یہ دن پوری دنیا کے لیے پیغام ہے کہ پاکستان نے تخریب کار ی کے خاتمے کے لیے عظیم قربانیاں دی ہیں، ہماری یہ جدوجہد جاری ہے جو اس عفریت کے مکمل خاتمے تک اسی آہنی ارادے اور ثابت قدمی سے جاری رہے گی۔دریں اثناءوفاقی وزیر اطلاعات مریم اورنگزیب نے سانحہ اے پی ایس میں جاں بحق افراد کی آٹھویں برسی پر پیغام جاری کرتے ہوئے کہا ہے کہ 16 دسمبر کا دن آرمی پبلک سکول کے شہدا کی عظیم قربانیوں کی ہمیشہ یاد دلاتا رہے گا۔ مریم اورنگزیب نے کہا ہے کہ 8 برس گزرنے کے باوجود بھی ہم سانحہ اے پی ایس کو نہیں بھول سکے، بزدل شرپسند عناصر نے قوم کے مستقبل، نہتے کم سن بچوں پر حملہ کر کے انہیں جاں بحق کیا، اس دن کو یاد کر کے کوئی اپنے آنسو نہیں روک سکتا۔ وفاقی وزیر اطلاعات نے کہا کہ سانحہ اے پی ایس کے بچوں نے عوام کو تخریب کاری کے خلاف متحد کیا، ہم نے تخریب کاری کو شکست دینے کیلئے طویل سفر طے کیا، اب پاکستان دیرپا امن اور ترقی کی جانب گامزن ہے۔ مریم اورنگزیب نے کہا کہ اللہ تعالی جاں بحق افراد کے درجات بلند کرے او ان کے اہلخانہ کو صبر جمیل عطا کر۔