قاسم سلیمانی کی برسی پر کباب کی ڈش تیار کرنیوالے مشہور ایرانی شیف گرفتار

تہران (مانیٹرنگ ڈیسک) ایرانی انسانی حقوق کی تنظیموں نے جمعرات کو اعلان کیا کہ ایران میں سیکورٹی فورسز نے ملک کو ہلا دینے والے مظاہروں کو دبانے کے ایک حصے کے طور پر مشہور شیف نواب ابراہیمی کو گرفتار کر لیا ہے۔ابراہیمی کو سوشل میڈیا پر لاکھوں لوگ فالو کرتے ہیں۔ انسانی حقوق کی تنظیم نے کہا کہ ابراہیمی کو تہران کی ایوین جیل لے جایا گیا۔ فوری طور پر واضح نہیں ہو سکا کہ انسٹا گرام پر 2.7 ملین فالوورز والے شیف کو کیوں گرفتار کیا گیا تاہم ان کی ایسی وڈیوز دیکھی گئیں جس میں وہ بتاتے ہیں کہ روایتی ایرانی کھانوں کی انتہائی لذیذ ترکیبیں کیسے تیار کی جاتی ہیں۔ انٹرنیٹ پر متحرک رہنے والے افراد نے کہا ہے کہ نواب ابراہیمی کی گرفتاری اس وقت عمل میں آئی جب انہوں نے اپنے انسٹاگرام اکاؤنٹ پر ایک وڈیو کلپ پوسٹ کیا جس میں کہا گیا تھا کہ کباب سے ملتی جلتی روایتی ایرانی ڈش کٹلیٹ تیار کرنے کا طریقہ کیا ہے۔ اس ڈش میں خاص طور پر قیمہ استعمال کیا جاتا ہے۔ان کے مطابق ابراہیمی نے یہ نسخہ اسی دن شائع کیا تھا جب تہران نے تین سال قبل عراق میں امریکی فضائی حملے میں پاسداران انقلاب میں قدس فورس کے کمانڈر قاسم سلیمانی کے قتل کی یاد منائی تھی۔ہر سال سلیمانی کے قتل کی برسی کے موقع پر ایرانی حکومت کے مخالفین کٹلیٹ ڈش کی تصاویر شائع کرتے رہتے ہیں جس میں اس جنرل کو امریکی ڈرون کے حملے میں قتل کرنے کے انداز کا حوالہ دیا جاتا ہے۔