خواتین کے بغیر زندگی نامکمل اور تصویر کائنات بے رنگ ہے،شہباز شریف

لندن: پاکستان مسلم لیگ (ن)کے صدر قائد حزب اختلاف شہباز شریف نے کہا ہے کہخواتین کے بغیر زندگی نامکمل اور تصویر کائنات بے رنگ ہے، ماں، بہن، بیٹی، بیوی کی صورت میں خواتین کی موجودگی سے ہی انسانی رشتے ناطے وجود میں آتے ہیں،اللہ تعالی نے عورت کو ماں کی صورت اپنے تعارف کا ذریعہ بنایا ہے،جس سے بڑا مقام، احترام، تعارف اور عزت اور نہیں ہوسکتی۔ اتوار کو خواتین کے عالمی دن پر اپنے پیغام میں شہباز شریف نے کہا کہ اسلام نے عورت کو بے پناہ عزت اور حقوق عطا کئے ہیں، ماں کے قدموں کے نیچے جنت رکھ کر اللہ تعالی نے عورت کے مقام اور احترام کو واضح کردیا ہے،آقائے محترم حضرت محمد صلی اللہ علیہ وسلم نے خواتین کی عزت و احترام کا ہمیں بہترین نمونہ اور رہنمائی عطا فرمائی ہے۔ انہوں نے کہا امہات المومنین، حضرت فاطمہ الزہرا اور اہل بیت اطہار ہمارے لئے رہنمائی کی بہترین مثالیں ہیں، خواتین نے تحریک پاکستان میں نے ناقابل فراموش کردار ادا کیا،مادرملت محترمہ فاطمہ جناح کے ہمراہ خواتین کا کردار تاریخ میں سنہری حروف سے درج ہے، الحمداللہ آج ہماری خواتین زندگی کے ہر شعبے میں اپنی بہترین صلاحیتوں کا مظاہرہ کر رہی ہیں، دفاع سے تجارت، تعلیم وطب سے لے کر سائنس و ٹیکنالوجی اور صحافت تک ہر شعبے میں خواتین اپنی صلاحیتوں کا لوہا منوارہی ہیں،ہم خوش قسمت ہیں کہ ہماری نصف زائد آبادی خواتین پر مشتمل ہے،عورت کی تعلیم، اچھی صحت اور معاشی طور پر بااختیار ہونا کسی بھی معاشرے کی ترقی و خوشحالی کی ضمانت ہے۔ انہوں نے کہا عورت معاشرے کے رویوں، برتا اور ہمارے اس سے سلوک کا آئینہ ہے، کوئی خامیاں نظر آتی ہیں تو ہمیں اپنی انفرادی واجتماعی اصلاح پر توجہ دینا ہوگی،انتشاراور الزام تراشی سے بچا جائے، مہذب انداز میں مکالمہ، رائے کے اظہار اور علم و آگہی کے پرچار کی آزادی لازم ہے نواز شریف کی قیادت میں پاکستان مسلم لیگ (ن)نے ہمیشہ خواتین کے حقوق کے تحفظ اور فروغ کے لئے موثر اقدامات کئے یقین دلاتے ہیں کہ اللہ تعالی نے دوبارہ موقع دیا تو خواتین کی تعلیم، صحت اور معاشی بہتری کے لیے تاریخی اقدامات کریں گے۔

اپنا تبصرہ بھیجیں