پاکستان کے حالات اچھے نہیں، پیپلز پارٹی سے نجات حاصل کرنا ہوگی، سندھ یونائیٹڈ پارٹی

کراچی : سندھ یونائیٹڈ پارٹی کے صدر سید زین شاہ نے کہا ہے کہ سندھ کو پیپلز پارٹی نے پچھلے 15 سال میں بیچ دیا ہے اور اب اس کو توڑنے کا منصوبہ بنا رہی ہے۔ کراچی کے نجی اسپتال سے جاری اپنے وڈیو بیان میں سید زین شاہ نے کہا کہ پچھلے 9 دن سے طبیعت بہت زیادہ خراب تھی، اب بہتری کی جانب گامزن ہوں، پھیپھڑوں کا عارضہ ہے، ڈاکٹروں نے کہا ہے کہ طبیعت بہتر ہونے میں کافی وقت لگے گا۔انہوں نے کہا کہ طبیعت خرابی کی وجہ سے سندھ مارچ کو ادھورا چھوڑنا پڑا، 16 دن سکھر سے نواب شاہ تک پیدل مارچ کیا، دوست ابھی تک مارچ کر رہے ہیں، جی ڈی اے والے دوست بھی بھرپور تعاون کر رہے ہیں۔سید زین شاہ نے کہا کہ سارے وطن دوست، سندھ دوست اور ملک دوست کو کہتا ہوں کہ پاکستان کے حالات اچھے نہیں ہیں، پیپلز پارٹی سے نجات اور اس کرپٹ سسٹم سے جان چھڑانے کے لیے ہمیں مل کر نکلنا ہو گا۔انہوں نے مزید کہا کہ تمام طبقات اور خصوصا سندھ میں رہنے والے لوگوں سے اپیل کرتا ہوں کہ اس ناسور اور کینسر پیپلز پارٹی سے جان چھڑانے کے لیے اس کو سیاسی طور پر روٹ آﺅٹ کیا جائے۔