ماربرگ وائرس ،سعودی عرب اور عمان نے اپنے شہریوں کو گنی اور تنزانیہ کے سفر سے روک دیا

ریاض/مسقط(مانیٹرنگ ڈیسک)سعودی عرب اور عمان نے اپنے شہریوں کو دو افریقی ممالک کے سفر سے روک دیا۔عرب میڈیا کے مطابق سعودی حکام نے افریقی ملک گنی اور تنزانیہ میں ماربرگ وائرس کے باعث اپنے شہریوں کو دونوں ممالک کے سفر سے روک دیا ہے۔سعودی وزارت صحت کی جانب سے جاری ہدایات میں کہا گیا ہے کہ شہری بیماری پرقابو پائے جانے تک ان دو ممالک کا سفر نہ کریں جب کہ ان دو ممالک میں پہلے سے موجود سعودی شہریوں کو مقامی حکام کی جانب سے جاری حفاظتی گائیڈلائنز پرعمل کرنے کی ہدایت کی گئی ہے۔ دوسری جانب عمان نے بھی اپنے شہریوں کو ان دو افریقی ممالک کے سفر سے فوری طور پر روک دیا ہے۔ میڈیا رپورٹس کے مطابق ماربرگ وائرس سے گنی میں اب تک ہلاکتوں کی تعداد 9 ہوگئی ہے جس میں مزید اضافے کا خدشہ ہے جبکہ گزشتہ ہفتے تنزانیہ نے ماربرگ وائرس سے پانچ ہلاکتوں کی تصدیق کی تھی۔ ماربرگ وائرس کی علامات میں شدید بخار، خون کا رسا اور اعضا کا خراب ہونا شامل ہے جبکہ یہ وائرس افریقہ سے ہی سامنے آنے والے وائرس ایبولا سے ملتا جلتا ہے۔