کینیڈا میں چور ائیرپورٹ سے 4 ارب روپے سے زائد مالیت کے سو نے اوردیگر سامان سے بھرا کنٹینر لے اڑے
ٹورنٹو(صباح نیوز)یقین کرنا مشکل ہوگا مگر کینیڈا کے شہر ٹورنٹو کے پیئرسن انٹرنیشنل ائیرپورٹ سے چور ڈیڑھ کروڑ ڈالرز (4ارب 25 کروڑ پاکستانی روپے) سے زائد مالیت کے سونے اور دیگر قیمتی سامان سے بھرا کنٹینر لے اڑے۔پولیس کی جانب سے اس پراسرار چوری کے پیچھے چھپے افراد کو تلاش کیا جا رہا ہے۔ پولیس افسر اسٹیفن ڈیوسٹین نے بتایا کہ گزشتہ دنوں ایک طیارے نے یہ کنٹینر ائیرپورٹ پر پہنچایا اور پھر اسے گودام میں لے جایا گیا۔ اس کے بعد یہ کنٹینر غیر قانونی طریقے سے وہاں سے ہٹا دیا گیا۔ پولیس کی جانب سے یہ نہیں بتایا کہ سکیورٹی کیمروں میں کچھ ریکارڈ ہوا یا نہیں، کس فضائی کمپنی نے کنٹینر پہنچایا تھا یا اس کا مالک کون تھا۔ اسٹیفن ڈیوسٹین نے بتایا کہ ‘میں بس یہ کہہ سکتا ہوں کہ کنٹینر میں سونے کے ساتھ ساتھ دیگر قیمتی اشیا بھی تھیں، جن کی مالیت 2 کروڑ کینیڈین ڈالرز سے زائد ہے۔ انہوں نے کہا کہ چوروں کے بارے میں ابھی کچھ کہنا قبل از وقت ہوگا۔ ان کا کہنا تھا کہ واقعے کو 3دن ہو چکے ہیں اور ہر پہلو کی تفتیش کر رہے ہیں۔ اس کنٹینر کا حجم 5 یا 6 اسکوائر فٹ ہے اور اس کے غائب ہونے سے ائیر پورٹ کے کسی آپریشن پر اثرات مرتب نہیں ہوئے۔
