متحدہ عرب امارات میں تیل کے ڈپو میں دھماکا،2 افراد جاں بحق، 3 زخمی
ابوظہبی(مانیٹرنگ ڈیسک) متحدہ عرب امارات کے صنعتی ایریا میں ایک آئل ڈپو میں زور دار دھماکے کے بعد خوفناک آگ بھڑک اٹھی جس کے نتیجے میں 2 افراد جاں بحق اور 3 افراد زخمی ہوگئے۔ عرب میڈیا کے مطابق متحدہ عرب امارات کے شہر عجمان کے الجرف صنعتی علاقے کے فیول ٹریڈنگ کمپنی کے گودام میں ایک آئل ڈپو میں ڈیزل ٹینک پھٹ گیا۔ ٹینک بھٹنے سے 2 افراد ہلاک اور 3 زخمی ہوگئے۔عجمان پولیس کا کہنا ہے کہ ابتدائی تفتیش کے مطابق کمپنی کے آئل ڈپو کے ٹینک کے اوپر دو افراد ویلڈنگ کر رہے تھے۔ ٹینک کے اندر چنگاریاں گرنے سے دھماکا ہوگیا اور دونوں مزدور موقع پر ہی ہلاک ہوگئے۔پولیس ترجمان کا مزید کہنا تھا کہ دھماکے کے نتیجے میں ہلاک ہونے والے دونوں افراد کا تعلق ایشیا سے ہے تاہم ان کی شناخت ظاہر نہیں کی گئی۔ٹینک میں ہونے والے زور دار دھماکے میں ٹینک کے کور کے ٹکڑے پڑوسی فیکٹری میں 3 مزدوروں کو لگے جس سے وہ شدید زخمی ہوگئے۔
