مصر میں اسکول ٹیچر نے پہلی پوزیشن لینے پر شاگرد کو 10 لاکھ پانڈ کی کار تحفے میں دیدی
قاہرہ(مانیٹرنگ ڈیسک)مصرمیں استاد نے سیکنڈری اسکول میں پہلی پوزیشن لینے والے طالب علم کو دس لاکھ پانڈ مالیت کی پر آسائش کار تحفے میں دی ہے۔ مصری جریدے کے مطابق شمالی مصر کی کفر الشیخ کمشنری میں جیالوجی کے استاد کی جانب سے سائنس میں اول آنے والے محمود محمد عبدالفتاح کو تحفہ دیے جانے پر پورے ملک میں خوشی کا سماں ہے۔ مصری استاد کا کہنا تھا کہ پہلی تین پوزیشنیں لینے والے تینوں طالب علم ان کے شاگرد ہیں، باقی دو طلبہ کو بھی انعامات دیے جائیں گے۔ مصری استاد نے ایک ہفتہ قبل طے کیا تھا کہ ثانوی اسکول میں جو طلبہ پوزیشنیں لیں گے انہیں وہ شاندار انعام دیں گے۔ رپورٹس کے مطابق محمود عبدالفتاح نے 410 میں سے 403 نمبر حاصل کیے۔ وزیر تعلیم و تربیت نے محمود عبدالفتاح کو شان دار کامیابی کی خوش خبری سنائی۔ طالب علم نے اپنی کامیابی کا راز بتاتے ہوئے کہا کہ انھوں نے تیاری کے لیے کوئی خاص وقت متعین نہیں کیا تھا، البتہ وہ کامیابی کے لیے محنت کرتے رہے۔ امتحانی پرچے میں بعض سوالات منفرد صلاحیت رکھنے والے طلبہ کے معیار کے تھے۔ مستقبل کے بارے میں انھوں نے کہا کہ وہ ایم بی بی ایس میں داخلہ لیں گے اور امراض قلب میں اسپیشلائزیشن کا ارادہ رکھتے ہیں۔
